Бүсгүй та нэг л төрөл, загварын гутал өмсдөг үү? Эсвэл байж болох бүх л загварыг таашаадаг уу? За аль нь ч байсан яахав. Хүн л юм болохоор аль нэгийг нь таашаадаг л байж таараа. Ямар ч байсан таны өмссөн гутлаар зан аашийг чинь төдийгүй зүрх сэтгэлийг чинь ч мэдэж болох гэнэ.

Нэртэй загвар зохион бүтээгч, хуучин гутал цуглуулагч Донна Каран “Бүсгүй хүний амьдралд болон өөртөө хандах хандлага нь газраас эхлэн дээш өгсөж явдаг. Гутал нь ямар загвартайгаас хамааран хүний алхаа гишгээ, явдал, биеэ авч яваа байдал нь хүртэл өөрчлөгдөнө...” гэж ярьдаг аж. Магадгүй бүсгүй та үүнтэй санал нийлэхгүй байгаа бол нэгэн сонирхолтой жишээн дээр тайлбарлая.
Эрэгтэй загварын костюмыг хэд хэдэн бүсгүй янз бүрээр өмсчээ гээд төсөөлөөд үз дээ. Нэг нь маш намхан шулуун ултай шаахайн дээр, нөгөө нь мохоо хоншоортой бат бөх өндөр өсгийтэй туфль дээр, гурав дахь нь бүр хадаасан өсгийтэй туфльтэй өмсчээ. Энэ гурван бүсгүй тус бүр костюмны байдлыг өөрчилж байгаа төдийгүй өөрийнхөө тухай гурван өөр зүйлийг хэлж өгч байна.
“Гоо сайхны хүч” номын зохиогч Нэнси Фрайди “өндөр өсгий бол бүх талын анхаарал шаардсан байдаг. Өндөр өсгийтэй гутал хүсэл, тачаалаас атаархал, үзэн ядалт хүртэлх бүх төрлийн мэдрэмжийг төрүүлж байдаг. Гэхдээ л өндөр өсгийтэй гуталтай бүсгүйг эрчүүд огт анхаарахгүй байна гэж байдаггүй.
Харин намхан, шулуун ултай гутал өмсөх сонирхолтой бүсгүйчүүд тэмцэлдэх дургүй. Ийм гутланд дуртай хүмүүс хүний нүднээс далдхан байх хүсэлтэй байдаг. Ийм байдалтай болдог нь хүүхэд үеийн сэтгэхүй, өссөн орчинтой нь юм уу олон хүний анхаарлын төвд байхдаа өөрийгөө ямар хүн бэ гэдгээ мэдэрдэгтэй нь холбоотой гэж бичсэн байна. Гэхдээ энэ нь та насан туршдаа нэг л төрлийн гутал өмсөж явах болно гэсэн үг биш шүү дээ. Гутлын загвар зохион бүтээгч Кеннет Коул гутал бол хүний сэтгэл санааны байдлын хэмжүүр гэж үздэг. Тэрбээр “Хувцас, гоёл чимэглэлээс илүү гутал л хүний сэтгэл санаа ямар байгааг илэрхийлж чаддаг. Хэрвээ таны сонгосон гутал нэг л таагүй сэтгэгдэл төрүүлж байгаа бол та зүрх сэтгэлдээ ч гэсэн тавгүй яваагийн шинж юм” гэжээ.
Та бодоод үз дээ. Өглөө сэтгэл нэг л таагүй, хэнтэй ч уулзмааргүй, хүний нүдэнд өртөлгүй шиг өнгөрөөмөөр санагдвал өөрийн эрхгүй муухан, намхан шиг гутал юм уу пүүз өмсөөд гарах вий. Харин сэтгэл санаа өөдрөг, хүн амьтантай уулзаж ажил бүтээж наргиж хөгжье гэвэл хамгийн гоёмсог, өндөр өсгийтэй гутлаа өмсөөд гарч байгаа. Тэгэхээр гутал гэдэг үнэхээр сэтгэл санааны толь юм.
Италийн загвар зохион бүтээгч Маноло Бланик бусад хувцсаас ялгаатай нь бид гутлаа ямар ч толины тусламжгүй өөрөө харж чаддагт ихээхэн учир оршдог гэж үздэг.
Тиймээс Бланик “Бид өөрөө өөртөө тааламжтай байх гэж л гутал худалдаж авдаг” гэж ярих дуртай гэнэ.