Миний дүүг буудаж алчихаад задлан шинжилгээ хийсэн байна

Ард олны дунд дүүрэн айдас хүйдэс. Үүр цүүрээр унтаж байхад гэрт нь цагдаа орж ирээд хүүг нь, аавыг нь ахыг нь баривчлаад явж бай­на. Талбай дээр болсон жаг­саалд оролцсон иргэдийг барьж хориод эрүү­дэж тө­рийн нударгаа ха­руулж эхэлжээ. Хамгийн ноцтой нь сураггүй алга болсон хү­мүүсээ буудуулж нас барс­ныг дуулж эхэлсэн нь айм­шигтай байна. Жаг­саал цуг­лааны үймсэн олны дунд хичнээн хүн бууны суманд хэрцгийгээр өртөж амиа алд­сан болох нь то­дорхойгүй байна. Өчигдөр гэхэд буудуулж амиа алдсан гурван хүний ар гэрийнхэн хэнд, хаана хан­дахаа мэдэхгүй, нус нулимс болчихсон явна.

Дүү­гээ алга болчихоор нь гай­хаад сууж байтал түүнийг маань шилэн хүзүүгээр нь тас буудчи­хаад задлан хийчихэж. Монгол Улсад өнөөдөр юу болоод байна вэ. Харгислал арай хэтэрч байна. Нэгийг нь алчихаад нөгөөг нь шоронд хорьчихсон гэж гашуудан ярих энгийн иргэдтэй за­хаасаа аваад таарч байна. Баттай эх сурвалжийн мэ­дээл­лээр  24 настай Э.Дорж­сүрэн, 27 настай Р.Мөнх-Эрдэнэ, 36 настай Ц.Энхбаа­тар гэсэн гурван хүнийг байл­дааны буугаар буудаж аминд нь хүрчээ.

Талийгаач Р.Мөнх-Эр­дэнийн хүргэн ах У.Чулуун­тай ярилцлаа.
-Дүү маань хөдөөнөөс ирсэн мах очиж авна гээд гарсан юм билээ. Эхнэр нь ээлжийн ажилтай тул 22 ца­гийн үед хоол аваачиж өгчи­хөөд ээжийнхээрээ ороод гарсан байна лээ. Тэрнээс хойш ямар ч сураггүй байж байгаад энэ сарын 2-ны өд­рийн 14 цаг өнгөрч байхад цагдаагаас утасдсан. Сүх­баатар дүүргийн цагдаагийн ажилтан Долгорсүрэн гэдэг хүн дүүгийн маань эхнэр рүү утасдаж "Мөнх-Эрдэнийн бие нь тааруу байна" гэж мэ­дэгдсэн.

-Танай дүүгийн биед бичиг баримт байсан уу?
-Манай дүүг хэн бэ гэж эрж тодруулах шаардлагагүй. Ажилд орох санаатай Дорно­доос ирээд удаагүй байсан. Дүүгийн маань хувцсанд цаг­даагийн газрын тодорхойлолт, бичиг баримт, өөрийнх нь болон эхнэрийнх нь утасны дугаар, мөнгө шилжүүлсэн баримт байсаар байтал дүүд маань задлан шинжилгээ хийсний дараа бидэнд дуул­гасанд гайхаж байна. 12 цагт задлан шинжилгээнд оруул­чихаад ар гэрийнхэнд нь 14 цагт "Бие нь муу" гэж дуул­гасныг юу гэж ойлгох юм бэ. Цагдаа нар хамгийн түрүүнд биед нь нэгжлэг хийж л таарна. Бидэнд шууд мэдэгдээгүйд маш их гайхаж байна.

-Та талийгаачийг ямар байдалтай нас барсныг харсан уу. Буудуулсан гэдэг үнэн үү?
-Би Сүхбаатар дүүргийн цагдаагийн хэлтэст очиход надад түрийвчийн доторх зургийг нь харуулсан. Тэнд цагдаагийн ажилтныг хүлээж зогсохдоо баривчлагдсан хүмүүсийн нэрс байсныг нь харсан. Тэр дунд манай талийгаачийн нэр, регистр байсан. Бид нар амьд байна хөөрхий гэж их баяр­ласан даа. Тэгээд Сүхбаатар дүүргийн цагдаагийн хэлт­сийн саатуулах байрнаас Мөнх-Эрдэнэ гэдэг хүн байна уу гэж дуудахад гарч ирээгүй.

Цагдаагийнхан эхлээд битүү цус нөж болчихсон, нүд ам нь хавдчихсан талий­гаачийн зургийг харуулахад таниагүй. Цэвэрлэсэн зургийг нь хараад таньсан. Зодуул­сан байх магадлалтай юм билээ. Би арайхийн биеэ барьж байгаад талийгаачид задлан хийснийг нь харсан. Шилэн хүзүүгээр нь сум нэвт гарсан бололтой.

Буудуулсан хүү Э.Энхтөр: Миний хөлийн булчинг нэвт буудсан
Талбай дээр үймсэн олны дунд гүйж явсан 16 настай хоёр хүү өнөөдөр эмнэлэгт өвчиндөө шаналан тааз шир­тэн хэвтэж байна. Сонгуулийн маргааш өдөр болсон жаг­саалын үеэр гэмгүй олон иргэд буудуулсны нэг хохи­рогч нь. Тэдний нэг болох есдүгээр ангийн сурагч Э.Энх­төртэй уулзлаа. Гэмтэл согог, сэргээн засах клини­кийн эмнэлэгт хэвтэж байгаа бөгөөд хагалгаанд орохын өмнөхөн амжиж уулзсан юм.

-Биеийн байдал нь яаж байна?
-Шөнөдөө их өвдөж байна. Хөлийнхөө булчингаар нэвт буудуулсан.

-Тэнд юу болсон талаар санаж байгаагаа яриач?
-Талбайгаас урагшаа ал­хаж явтал бөөн хүмүүс цаг­даа нартай байлдаж байсан. Би тэрийг анзаараагүй тал­байгаас зүүн талд нэлээн наагуур явж байтал гэнэт хөл гишгэж чадахаа больчихсон. 23 цагийн үед энэ явдал болсон. Би уг нь шоу болно гэж сонсоод найзуудтайгаа тэнд явж байсан юм.

-Буун дуу сонсдоогүй юу. Хаанаас хэн буудсаныг мэдсэн үү?
-Хөл гишгэж чадахаа болиод өнхрөөд явчихсан. Ямар нэгэн дуу чимээ сонс­доогүй. Ямар хүн буудсныг би мэдэхгүй. Цагдаа нар галт зэвсэг хэрэглэсэн юм шиг байна лээ. Түүнээс үрлэн сум байсан бол сум нь ингэж нэвтэлнэ гэж байхгүй биз дээ. 

Э.Энхтөрийн зүүн та­лын гуяыг зад бууджээ. Түүний ээж Г.Эрдэнэцэцэг болсон явдлын талаар ярьж байв.
"Шөнө 04 цагийн үед Гэм­тэл согог, сэргээн засах клиникийн эмнэлгээс манай нөхөр рүү утасдсан. "Танайд Энхтөр гэдэг хүүхэд байдаг уу. Сүлбүүлчихсэн юм шиг байна" гэсэн. Очиход бууны сумыг нь авчихсан уу яасан, зөндөө их цус алдсан байсан. Эрүүл саруул явсан хүү маань нэг өдөр тахир дутуу болчихсонд маш их гомдолтой байна.

Телевизээр цагдаа нар буудсан гэж ярьж байсан ч одоо болохоор гал нээгээгүй гэж ярих юм. Дээрээ хоёр эгчтэй бага хүү маань маш хүнд хагалгаанд одоо орох гэж байна. Төр засаг, хууль хя­нал­тын байгууллагад гомдол­той байна гэж байв.

Гэмтэл согог сэргээн засах клиникийн эмнэлэгт буудуулсан хоёр хүү хэв­тэж байна. Нэг нь хагал­гаанд орох гэж байгаа бол нөгөө нь хагалгаанд ор­сон, биеийн байдал тун тааруу байна. Эмнэлэгт Ерөнхий сайд С.Баяр гэмт­сэн хүмүүстэй уулзаж ява­хад буудуулсан хоёр хүүх­дийг тас нуугаад уулзуу­лаа­гүй юм билээ. Мөн АН-ын дарга Ц.Элбэгдоржийг эмнэлэгт ирэхэд ч тэдэнд бууны шархтай хүн бай­гааг хэлэлгүй тас нууж байсан бололтой юм. На­санд хүрээгүй цэл залуухан хоёр хүү үүрд мөнхийн тахир дутуу эрэмдэг болж хоцорч байна гэж ар гэ­рийн­хэн нь гомдолтой байна. Буудуулж нас бар­сан хүний тоо нэмэгдэх төлөвтэй. Цэргийн гос­пи­таль, I эмнэлэгт буу­дуулж нас барсан хүний цогцос байгаа мэдээлэл ирсээр. Төр засаг хууль хяналтын байгууллага нас барсан хүмүүсийн мэдээл­лийг тас нууж, харин хорьж цагдах ажиллагаа­гаа гарамгай хийж байна. Харгислал, хэлмэгдүүлэлт  гэж үүнийг хэлэх байх даа.

Б.Долзолмаа