Монгол Улсын Ерөнхийлөгч Н.Энхбаярт БНСУ-аас Монгол Улсад суух онц бөгөөд бүрэн эрхт элчин сайд Жон Ил итгэмжлэх жуух бичгээ өргөн барилаа.
Элчин сайд Жон Ил-ийг итгэмжлэх жуух бичгээ өргөн барьж буйтай нь холбогдуулан Ерөнхийлөгч Н.Энхбаяр хүлээн авч уулзсан бөгөөд хоёр орны харилцаа эдийн засгийн бүх салбарт амжилттай хөгжиж байгааг онцлон тэмдэглэлээ.
Мөн энэ үеэр төрийн тэргүүн манай иргэдийн Солонгос Улсад ажиллаж, сурч, ажиллахад хүмүүнлэгийн дэмжлэг үзүүлж, тусалж байдагт талархал илэрхийлж хоёр орны харилцааг цаашид шинэ шатанд гарган хөгжүүлэхэд олон сайн төсөл хөтөлбөр хэрэгжинэ гэдэгт найдаж байна гээд БНСУ-ын Ерөнхийлөгчийн тааламжтай цагтаа Монгол Улсад айлчлахыг урилаа.
Элчин сайд Жон Ил БНСУ-ын Ерөнхийлөгчийн мэндчилгээг уламжилж, ирэх онд хоёр орны найрамдалт харилцаа тогтоосны 20 жилийн тохиож буйг тэмдэглээд хоёр улсын өндөр түвшинд хүрсэн харилцааг цаашид хөгжүүлж идэвх чармайлт гарган ажиллахаа илэрхийллээ.