Даваа, 2009 оны 3-р сарын 2 Улаанбаатар хотын автозамын асуудлыг шийдвэрлэх 2020 он хүртэлх төлөвлөгөө бий. Энэхүү төлөвлөгөөний дагуу Хятадын зам гүүрийн улсын үйлдвэрийн газрын компани манай улсын автозамын өнөөгийн байдалд дүгнэлт хийж, цаашид барьж байгуулах замын төлөвлөгөөг гаргажээ. Энэхүү дүгнэлтээ өнөөдөр Улаанбаатар хотын захирагч Г.Мөнхбаярт танилцууллаа. Тэдний зүгээс нийслэлчүүдийг нэн яаралтай автомашины өсөлтөө сааруулах зөвлөгөөг өгсөн юм. Энэ талаар нийслэлийн автозамын газрын дарга Г.Бат-Эрдэнээс зарим зүйлийг тодрууллаа. -Замын асуудлыг хэрхэн шийдвэрлэх болов? -Хятадын зам гүүрийн улсын үйлдвэрийн газрын компани ирж Нийслэл Улаанбаатар хотын замын 2020 он хүртэлх ерөнхий төлөвлөгөөн дээр ажиллалаа. Үүнээс гадна одоогийн байгаа замын ачааллыг манай автозамын газрын гаргасан тооцоо судалгаан дээр үндэслэн Улаанбаатар хотод хаана гүүрэн гарц, давхар замуудыг барих шаардлагатай байна вэ гэдэг дээр дүгнэлт гаргасан. Эхний ээлжинд Их тойрууг холбох нь зүйтэй юм гэдэг дээр санал нийллээ. Ингэснээр Улаанбаатар хотын замын ачаалал буурах юм. Мөн Нарантуул захын баруун талын төмөр зам дээр, Баянбүрдийн тойрог зам дээр, Саппорогийн тойрогт гүүрэн гарц зайлшгүй барих шаардлагатай юм байна гэдэг дээр санал нийлсэн. -Энэ жилийн хувьд зам засварын ажил хэзээнээс эхлэх вэ? -Улаанбаатар хотын замын сан гэж байдаг. Жил бүр явагддаг техникийн үзлэгээс Замын санд 4 тэрбум гаруй төгрөг бүрдэнэ. Энэ бүрдсэн мөнгөөр тухайн жилийнхээ замын засварыг хийдэг. Тавдугаар сарын нэгэн гэхэд үндсэндээ зам засварын ажил эхлэнэ. Ингэхдээ заммын сангийн хөрөнгөөр зөвхөн замын арчлалт хамгаалалт, засварын ажил хийгдэнэ. Бусад чиглэлээр улсын төсвөөс нилээн хэдэн гудамж замуудыг шинэчлэхээр төсөвт суусан байгаа. Гэхдээ төсвийн тодотгол одоо яригдаж байгаа учраас үүний дараа яг ямар зам гудамжийг шинэчлэх нь тодорхой болно. -Замын ажлыг гүйцэтгэгч компаниуд чанар хангахгүй муу зам тавьдаг гэдэг асуудал байнга гардаг. Энэ тал дээр ямар хяналт тавьж ажиллах вэ? -Замын хяналтыг манай нийслэлийн автозамын газар тавьдаг. Гүйцэтгэгч компаниудын хувьд техник эдийн засаг, ажиллах хүчин, машин механизмын хувьд сүүлийн 2-3 жилд нилээн бэхэжсэн.. Цаашдаа манай гүйцэтгэгч компаниуд Улаанбаатар хотын аль ч зам дээр гологдол гаргаад байхааргүй боломжтой болсон. Гурван жилийн өмнө замд гологдол гардаг байсан. Одоо тийм зүйл гарахгүй. Дашрамд сонирхуулахад, энэ жилийн техникийн улсын үзлэг гуравдугаар сарын 15-наас эхлэн тавдугаар сарын 1-нийг хүртэл үргэлжлэх боллоо.