Бичлэгийн тоо 4,493
Дэлхийн оюутны „Универсиад“ их наадмын жүдо бөхийн тэмцээний хоёр дахь өдрийн барилдаан өчигдөр /VII.08/ боллоо. Энэ өдөр эрэгтэйчүүдийн 81, 90 кг, эмэгтэйчүүдийн 63, 70 кг-ын жингийн барилдаан болж, манай дөрвөн тамирчин өрсөлдсөнөөс жүдо бөхийн ОУХМ П.Лхамдэгд /70 кг/ Монголын тамирчдын салхийг хагалж, мөнгөн медалийн эзэн боллоо. Манай тамирчин эхний тойрогтоо Словенийн бөх Миржанич Бранкатай барилдан 46 секундэд цэвэр ялж, дараагийн тойрогт Ливаны Боу Рачид Лоуйсег ялсан бол гуравдугаар тойргийн барилдаанд Казахстаны бөх Албина Аманбелдиеваг ялснаар мөнгөн медалийн төлөө барилдах боломжтой болсон юм. Хэсгийн аваргын төлөөх шийдвэрлэх барилдаанд манай бөх Английн тамирчин Гиббон Жеммаг ялсан бол аваргын алтан медалийн төлөө Японы тамирчин Кунихара Ёрикод оноогоор ялагдаж, энэ удаагийн наадмаас мөнгөн медаль хүртлээ. Ийнхүү П.Лхамдэгд мөнгөн медалийн эзэн болсноор монголчууд “Универсиад” наадмын түүхэнд ихэр мөнгөн медальтай боллоо. Өмнө нь манай тамирчид бага олимп гэгддэг оюутны “Универсиад” их наадмаас зургаан алт, нэг мөнгө, таван хүрэл медаль хүртэж байсан бөгөөд анхны мөнгөн медалийг 2007 оны наадмаас буудлагын тамирчин, ОУХМ Ц.Мөнхзул хүртэж байсан юм. Түүнчлэн Олон улсын хэмжээний мастер П.Лхамдэгд бага олимпиос мөнгөн медаль хүртэж буй анхны жүдоч болж байна.
Белградын татамид зодоглосон Монголын бусад тамирчдын тухай мэдээлэл хүргэхэд, эмэгтэйчүүдийн 63 кг-д өрсөлдсөн ОУХМ Ц.Мөнхзаяа эхний тойрогтоо ОХУ-ын Громова Иринд ялагдсан ч Оросын бөх цаашид амжилттай барилдсан тул торгуулийн барилдаан хийж, Испанийн Пуче Палао Марио, Словакийн Комлосиова, Кубын Абел Рояас нарыг оноогоор ялж, хүрэл медалийн төлөө барилдах эрхтэй болсон юм. Манай тамирчин хүрлийн төлөө Португалийн бөх Качало Ана-тай хүч тэнцүү өрсөлдөж, цаг сунган барилдан ялагдал хүлээснээр шагналт тавдугаар байрт орлоо. Харин эрэгтэйчүүдийн 90 кг-д барилдсан Э.Тулга эхний тойрогтоо БНХАУ-ын бөх Лиу Пенгэд ялагдсан бол 81 kг-д өрсөлдсөн Г.Түвшинжаргал Финляндын бөхөд ялагдсанаар тэмцээнийг орхилоо.