“Үнэгүй дуулж өгье” гэсэн М.Нарагийн хүсэлтийг урлагийнхан ихэд дэмжив

1
0
3 цагийн ѳмнѳ



Төв цэвэрлэх байгууламж нь ачааллаа дийлэхээ болиод нийслэлчүүд маань өтгөн шингэнтэйгээ “зууралдах” дөхсөн энэ хэцүү цаг үед төр засгийн эрхмүүд “Шинэчлэх мөнгө байхгүй” гэх мэт түмэн зовлон тоочиж суугаа. Сүүлдээ өнөөх бохироо Туул голд шууд асгаж эхэлснээр барахгүй энэ жилийн наадамд мөнөөх алдарт дуучин Женнифер Лопезыг урьж авчрах гэж буй нь олон нийтэд ил боллоо.

Ойролцоогоор нэг сая доллар буюу хоёр тэрбум орчим төгрөгөөр харийн дуучныг урьж, эрхэм ерөнхий сайд маань ёстой л “балай авах” тухай ярьсан юм байх. Энэ бүхнийг нь сонссон хүмүүс “Ер нь заавал гаднаас өндөр үнэтэй “том өгзөг” авчрах хэрэг байгаа ч юм уу. Тэрэнд орвол саяхан Asia's Got Talent-д хоёрдугаар байр эзэлсэн “Хөсөгтөн” хамтлагаа тоглуулвал сүртэй юм биш үү. Түүх уламжлалаа бодсон ч, гаргасан амжилтыг нь тооцсон ч яг л тохирох тоглолт. “Хүний нохой идэхээр өөрийн нохой идэг” гэдэг шиг үнэхээр мөнгө хаяж байгаа юм бол өөрийнхдөө л өгчих. Тэр нь шулуун шударга, ядаж л юм хийсэн шиг харагдана ш дээ, луйварчид аа.

Угаасаа юу ч зохион байгуулсан том жижиг дарга нар нь хувааж идэж уугаад дуусдаг хойно. Бас болоогүй ээ. Баасандаа "хутгалдаж" байж АСЕМ-ийн саммит зохино гэсэн. Ичиж амьдраасай. Гэхдээ юу гээч. Энэ тэнэг алхмууд Засгийн газрын чинь хойдохыг уншчих вий дээ. Монголчууд тэнэг биш шүү” хэмээн хараах нь холгүй бухимдацгаалаа.

Харин дуучин М.Нара “Тэр их мөнгөө нэн даруй хэрэгтэй байгаа ядуу өрх, олон хүхэдтэй өрх толгойлсон эмэгтэйчүүд, өндөр төлбөр шаардлагатай байгаа нялх балчир хүүхдүүддээ зориулчих. Би үнэгүй дуулая" гэж бичсэн нь сонсогч фэнүүдээс гадна урлаг соёлынхонд ч ихээр таалагдсан бололтой. Түүний үзэл бодлыг дэмжиж буйгаа илэрхийлэн үндэсний их баяр наадамд хамтдаа оролцохыг уриалжээ.



Б.Содон

PHOTONEWS.MN