Их сургуулийн хоёрдугаар курсийн оюутан байх цагаасаа “Шинэ үе”-ийн Т.Билгүүн гэж дуудуулах болсон тэрбээр анх тайзан дээр гарсныхаа дараа “Би ч жүжигчин болох болоогүй юм байна даа” гэж бодож байсан гэдэг.
Тэгвэл түүнийг хорвоогоос одсон тухай уйт мэдээ монголчуудыг тэр чигээр нь гунигт автуулж, харуусал тээлгээд амжлаа. Энэ бүхэн Төмөр замд өссөн дэггүй хөвгүүн аль хэдийнэ жүжигчин болж чадсныг илтгэж байгаа биз ээ.
Тэрээр нийслэлийн унаган иргэн бөгөөд Төмөр замд бага насаа өнгөрөөжээ. Зулай зулайгаа гишгэж төрсөн ахтай учраас “даруулгатай”, ганц охин дүүтэй учраас ахын энтэй ах байж, үлгэрлэн дуурайлгах “даалгавартай” өссөн байна. Гэхдээ хөвгүүдийн төрөлхийн зангаар хааяахан дэггүйтчихнэ. Т.Билгүүн сахилгагүйтмээр санагдахаараа ээж, аавдаа унадаг дугуйгаар Зайсан руу давхичихдаг байсан гэнэ. Энэ л түүний хамгийн том дэггүйтэл байжээ.
Тэрээр сурагч насныхаа тухай “Манай анги ёстой л “Хэцүү анги” байсан даа. Нийгмийн идэвхигүй, сурлага маруухан, бүх уралдаан тэмцээнээс хойш суудаг. Магадгүй кинон дээр гардаг “Хэцүү анги” манай ангийн хажууд харин ч амархан анги санагддаг” хэмээн дурссан удаатай. Гэвч “Хэцүү анги”-ийн Т.Билгүүн амьдрал дээрээ тийм ч их зантай, хөдөлгөөнтэй нэгэн байсангүй.
Ихэвчлэн хэл амтай, энд тэндгүй үсэчсэн дүрд тоглодог болохоор нь хүмүүс түүнийг нэлээд хөдөлгөөнтэй хүн хэмээн ойлгодог нь нууц биш. Харин Т.Билгүүн амьдрал дээрээ тун ч даруухан, дуу цөөтэй нэгэн. Түүнтэй анх танилцаж байгаа хүмүүсийн дийлэнх нь “Ийм дуу цөөтэй байсан юм уу. Жаахан юм ярь л даа” хэмээн аргадангуй гуйдаг байсан гээд бод л доо.
Хэдийгээр өдөр бүр шахам хошин шогийн тоглолттой байж, хүмүүст тэвэр тэврээр инээд бэлэглэдэг ч гэлээ тэрбээр өнгөрсөн жил “Намайг хүмүүс хошин шогийн жүжигчин гэж зуун хувь хүлээн зөвшөөрөөгүй байна” хэмээн даруухан “загнаж” байсан. Түүний дэлгэцийн анхны бүтээл нь “Буруу эргэлт” кино. Магадгүй энэхүү киноны дэврүүн омголон найзуудаасаа илт ялгарах даруухан, дуу цөөтэй, бодлогошронгуй тэр залуугийн дүр бодит амьдрал дээрх Т.Билгүүнтэй нэлээд төстэй ч байж мэдэх юм.
Харин хамгийн сүүлд “Ганц бие хатагтай нар” кинонд бүтээсэн сэтгэл зүйч Батаагийн дүр олон хүний сэтгэлд хүрсэн. Магадгүй тэрээр энэ л дүрээрээ олон хүний сэтгэлд мөнхрөн үлдсэн биз ээ. Арга залиар дүүрэн, хүний толгойг эргүүлэхдээ гаргууд Батаа амьдрал дээрээ хэзээ ч “Буруу эргэлт” хийж байгаагүй, мөн “Ганц бие хатагтай нар”-т сээтэн хаяж яваагүй нэгэн.
“Жилийн 200 хоногийг ажил дээрээ өнгөрөөдөг болохоор эмэгтэй хүнийг хайр халамжаар дутаачих байлгүй дээ” гэсэн чин сэтгэлээр олон жил ганц бие явсан. Тэрээр гэр бүлийн амьдрал зохиогоод гуравхан жилийг ардаа үдэж байсан билээ.
Т.Билгүүн архидан, согтуурлаа, зодоон цохион хийлээ, хүүхэн шуухантай холбогдлоо гэсэн мэдээ та хэзээ ч уншиж байгаагүй. Хайгаад ч олохгүй. Энэ бол хорвоод амьдарсан богинохон хугацаандаа цаг үргэлж зөв хүн байж чадсных нь нотолгоо. Тиймдээ ч өдгөө түүнийг таньдаг болоод таньдаггүй мянга мянган хүн Т.Билгүүнийг харуусал дүүрэн сэтгэлээр ертөнцөөс үдэж байна.
Алтан дэлхий, аав ээж, ах дүү, анд нөхөд, ард түмэндээ эргэн төрөх болтугай.
Ум мани бадми хум.
www.mnews.mn