Азийн олимпийн зөвлөл (OCA)-өөс хүүхэд, залууст тивийн наадмын тухай гүнзгий мэдлэг олгох, спортын сурвалжлагчийг багаас нь бэлтгэх зорилгоор “Өсвөрийн сэтгүүлчдийн хөтөлбөр” хэрэгжүүлж байгаа билээ. Манай тивийн арван оронд хэрэгжих энэхүү хөтөлбөрийн анхдагчаар Монгол Улс бүртгүүлж, 16 хүртэлх насны 53 сурагч уг арга хэмжээнд оролцлоо.

“Орчлон” сургуулийн есдүгээр ангийн сурагч Байгалийн Эрдэнэ хүү Азийн XVII наадмыг халуун цэгээс нь сурвалжлах, “Америк сургууль”-ийн Амарсайханы Анар охин 2014 онд БНСУ-ын Инчон хотноо тивийн “олимп”-ийн мэдлэг сорих шигшээ тэмцээнд оролцох эрхтэй боллоо. Азийн олимпийн зөвлөл (OCA) өөрийн гишүүн Үндэсний олимпийн хороодод спортын өсвөрийн сэтгүүлчдийг бэлтгэх хөтөлбөр хэрэгжүүлэхээр төлөвлөсний анхдагчаар манай улс бүртгэгдэв.

OCA, МҮОХ, “Инчон-2014” Азийн наадмыг ЗБХ –ноос явуулсан уг арга хэмжээнд “Орчлон”, “Улаанбаатарын Америк сургууль”, “Кингс Кидс”, Нэгдүгээр сургуулийн 16 хүртэлх насны 53 хүүхэд хамрагдсан. Уржигдар “Olympic House”-д “хөшгөө нээсэн”, уг ажиллагааны нээлтэд МҮОХны дэд ерөнхийлөгч Ц.Дамдин, ерөнхий нарийн бичгийн дарга, Спортын сэтгүүлчдийн холбооны ерөнхийлөгч Ж.Отгонцагаан нар болон Азийн олимпийн зөвлөлийн ажилтнууд оролцож, сурагчдад амжилт хүссэн юм.

OCA-гийн хэвлэл мэдээллийн албаны редактор, Их Британийн иргэн спортын сэтгүүлчээр 30 гаруй жил ажиллаж байгаа Жереми Уолкер “Инчон-2014”-ийг сурвалжлах хүсэл тэмүүллээр цугларсан багачуудад спортын сэтгүүл зүйн анхан шатны мэдлэг олгох сонирхолтой хичээл заасны дараа оролцогчид ур чадварын шалгалт өгсөн. Тэдний дундаас Азийн XVII наадмыг сурвалжлах өсвөрийн сэтгүүлчээр Б.Эрдэнэ шалгарчээ.

Харин Азийн наадмын мэдлэг сорих асуулт хариултын тэмцээнд өчигдөр болсон бөгөөд А.Анар нөхдөө хошуучилж, хоёр жилийн дараа Инчон хотноо болох шигшээ тэмцээнд өрсөлдөх замаа зассан байна Тэднийг уншигчидтайгаа уулзуулья.

-Та бүхэнд баяр хүргэе. Сэтгэгдлээсээ уншигчидтай маань хуваалцана уу?

Б.Э: Баярлалаа. Энэ хөтөлбөрт ялалт байгуулна гэж огтхон ч бодоогүй. Англи хэлний олимпиадад миний өмнө орсон хүүхдүүдийг түрүүлнэ гэж тааварласан. Харин өөрийгөө түрүүлснийг сонсоод ихэд баярласан даа.

А.А: Цагаан сарын өмнө Азийн наадмын талаарх мэдээллийг цуглуулж бэлтгэсэн. Солонгост очиж үзэхийг мөрөөддөг болохоор түрүүлэхийн төлөө чармайсан.

-Ямар сэдвээр эссе бичих даалгавар авсан бэ?

Б.Э: 100 м-ийн гүйлтэд алтан медаль хүртсэн тамирчны тухай англи хэл дээр нийтлэл бичих сэдэв ирсэн. Өндөр түвшинд бичихийг чармайсан.

-Харин асуулт хариултын тэмцээнд бэлтгэсэн асуултуудаас чинь түлхүү орж чадав уу?

А.А: Орсон. Гэхдээ хэцүү асуулт таарсан нь ч бий.

-Та хоёр спортын ямар төрөл сонирхдог вэ?

Б.Э: Волейбол, теннис сонирхдог.Хүндэлдэг тамирчин Испанийн Р.Надаль.

А.А: Теннис, усанд сэлэлтийн спортод дуртай.

-Ирээдүйд ямар мэргэжил эзэмших вэ?

Б.Э: Эмч, эсвэл сэтгүүлч болно.

“FUN RUN”

Үндэсний соёл амралтын хүрээлэнд болсон хөгжөөнтэй гүйлтийн тэмцээнд 400 гаруй сурагч хурд сорихоор бүртгүүлжээ. Уг гүйлтийн өмнө хайрах хүйтнийг үл хайхарсан хөвгүүд зодог шуудгаа өмсөн бөх барилдаж, бүжин наадаж, ая дуугаа өргөсөн нь цугларсан олныг хөгжөөв. МҮОХны ерөнхийлөгч Д.Загдсүрэн хүүхдүүдэд өндөр амжилт хүссэн бол Азийн олимпийн зөвлөлийн төлөөлөгч Вахид Кардани, “Инчон-2014”-ийн ЗБХ-ны зочдыг өлчир жаалууд гайхашруулж орхисон. Уралдаанд хөвгүүдээс Энгүүнсанаа (IV анги), Билгүүтэй (VIII), Эрдэнэ-Очир (IX), Саранцогт (XI), охидоос Алтжин (III анги), Даваанасан (VIII), Сэмжид (IX),Солонго (XI) нар нас насандаа өнгөллөө.