Бичлэгийн тоо 2,391
Даян аварга Г.Өсөхбаяр: Бид ард олныхоо өмнө гэм хийчихсэн хүн шиг харагдмааргүй байна
Уншсан 1668 vote 0 2009.09.07 12:17:49Хурлын үеэр БНСУ-ын Шинжлэх ухаан технологийн хүрээлэнгээс ирүүлсэн Олон улсын допингийн итгэмжлэгдсэн лабораторийн допингийн шинжилгээний хариуг дахин танилцууллаа. Даян аварга Г.Өсөхбаяр, Улсын харцага Ө.Бат-Орших, улсын начин Ц.Содномдорж нарын шинжилгээний хариунд допингийн бодис илрээгүй болохыг албан ёсоор мэдэгдлээ. Мөн Монголын үндэсний бөхийн холбооноос допингийн албан ёсны хариу ирээгүй байхад бөхчүүдийг нэр заан гүтгэж байсан зарим хэвлэл мэдээллийн хэрэгслүүдийг уучлалт гуйхыг албан ёсоор шаардлаа. Энэ талаар даян аварга Г.Өсөхбаяр ярихдаа:
-Сүүлийн арав гаруй жил допингийн шинжилгээ авч байна. Миний бие энэ хугацаанд байнга шинжилгээнд хамрагдаж байсан. Өнгөрсөн наадмын дараа Архангай нутагтаа очиж, өвөө аавынхаа наадмыг тэмдэглэж баяртай сайхан байж байтал зарим нэгэн телевиз, сонинд “бөхчүүдээс допинг илэрлээ. Түүн дотор даян аварга Г.Өсөхбаяр, Улсын харцага Ө.Бат-Орших, улсын начин Ц.Содномдорж нар байна” гэж нэр цохон мэдээлж эхэлсэн. Баяр наадмаа тэмдэглээд сайхан байж байтал гүтгэж доромжилсон ийм хар мэдээ гарсан нь сэтгэл санааны гүн хямралд ороход хүргэсэн. Мөн допингийн албан ёсны хариу ирэх хүртэлх хорь гаруй хоногт бид сэтгэл санааны хүнд дарамтанд байлаа. Гэтэл албан ёсны хариу иртэл ямар нэгэн допинг илрээгүй гэдэг нь тодорхой болсон. Тиймээс энэ хугацаанд гүтгүүлж доромжлуулж байсандаа гомдолтой байна. Допингийн хууль дүрмэнд албан ёсны хариу гартал хүний нэр усыг цохон олон нийтэд мэдээлэхгүй байхыг заасан байдаг. Тиймээс хариуцлагагүй мэдээлэл цацсан зарим сонин болон телевизийн сэтгүүлчдийг уучлалт гуйхыг шаардаж байна. Би сүүлийн хорин жил үндэсний бөхийн төлөө хөлс хүч, цаг нар, мөнгө хөрөнгө бүх зүйлээрээ зүтгэж ирсэн хүн. Тэгэхээр энэ хариуцлагагүй мэдээллээс болж өөрийнхөө нэрийг сэвтээмээргүй байна. Ард олныхоо өмнө гэм буруу хийчихсэн хүн шиг харагдмааргүй байна. Бид хуультай нийгэмд амьдарч байгаа хүмүүс. Тиймээс зохих хэвлэл мэдээллийн хэрэгслүүд уучлалт гуйхгүй бол бид шүүхэд хандана гэлээ.
Хэвлэлийн хуралд тус холбооны удирдлагууд болон даян аварга Г.Өсөхбаяр, улсын харцага Ө.Бат-Орших, улсын начин Ц.Содномдорж нар ирсэн байсан юм. Улсын харцага Ө.Бат-Орших, улсын начин Ц.Содномдорж нар ч мөн сэтгэл санааны хүнд цохилтонд орсон талаараа ярьсан юм.
Монголын үндэсний бөхийн холбооны тэргүүлэгчдийн хурлаар наадмын бус үед ч бөхчүүдээс допингийн шинжилгээ авч байх тухай хүсэлтээ ирүүлсэн цол цолны төлөөлөлтэй нэр бүхий бөхчүүдийнхээ саналыг дэмжин Монгол улсын даян аварга Г.Өсөхбаяраар ахлуулсан нэр хүнд бүхий есөн бөхөөс бүрдсэн “Допингийн эсрэг бөхчүүдийн зөвлөл”-ийг байгуулсан талаараа ч мэдээллээ.