“Хүүхдийн паркад шинэчлэл хийгээд, “Дисней лэнд” шиг болгоод баллаж тавина аа” хэмээн хэн нэгэн ам алдаж, паркийг хааснаас хойш өдгөө гурван жил өнгөрчээ. Энэ хооронд хүүхдүүд хаа нэг байх усан оргилуур дээр тоглож байх шиг байна. Учир нь том “ах” нар гэрийнх нь гадаах тоглоомын талбайг ч үгүй хийчихсэн билээ.

Харин өдгөө 35,9 га газартай байсан хүүхдийн паркийн газрын 10 хувь нь хувийн хэвшилд “шилжчихжээ”. Хүүхдийн паркийн хашаан дотор одоогоор 3 компани хаанаас зөвшөөрөл авсан нь үл ойлгогдох байдлаар байрлаж байна. Уг нь 2012 онд тус парк жинхэнэ ёсоор ашиглалтанд орно гэж байгаа боловч тэр хүртэл газрынх нь хэдэн хувь нь хувийн хэвшлүүдийн мэдэлд орохыг бид мэдэхгүй л байна. Газрын наймаа гэдэг иргэдийг өглөө босоод ирэх зуур, эсвэл нүд ирмэх зуур болдог эрх мэдэлтнүүдийн нууц наймаа гэдэг нь сүүлийн хэдэн жилийн дотор тодорхой болоод байгаа билээ.

Нэг нь урд хэсэгт нь байрлах “MCS” компанийн зочид буудлын газар. Нөгөө нь мөн хашаан дотор хэний зөвшөөрлөөр, яагаад ирсэн нь үл мэдэгдэх “Мон-Уран” компанийн барилга. Харин гурав дахь нь Сөүл компани. Сөүл компани хүүхдийн паркийн хашаанд байрлах хоёр давхар объектийг бүрэн эзэмшжээ. Тэр бүү хэл Хүүхдийн паркийнхны оффист ч байрлаад авч. Ингээд л бага багаар ахисаар л байна.

Харин өнөөдөр энэ бүхнийг цэглэж, хүүхдийн паркаа аваръя хэмээн СХД-ийн Ардчилсан намын залуус хэвлэлийнхэнд болон нийслэлчүүдэд хандан уриалж байна.

Тэд юун түрүүнд Нийслэлийн засаг дарга Г.Мөнхбаярт хандан албан хүсэлт гаргажээ. Энэ хүсэлтдээ:

-Хүүхдийн парк хэний мэдэлд очсон бэ, хэзээ шинэчлэгдэн ашиглалтанд орох вэ?
-Хүүхдийн паркийн газраас ямар үндэслэлээр хэдэн байгууллагад газар олгоод байна вэ?
-Хүүхдийн паркийн газраас тасалж авсан байгууллагууд хүүхдийн газраас авсныхаа төлөө ямар төлбөр, хэнд төлсөн бэ гэх зэрэг асуултуудыг тавьжээ. Мөн Нийслэлийн газрын албаны даргад хандан албан бичиг илгээсэн байна.

Ингээд хуульд заасанчлан албан бичгийн хариуг хүлээж байгаа ажээ. Харин тэд энэ хооронд хэвлэл мэдээллийн хэрэгслүүдээр чөлөөтэй хэлэлцүүлэг үүсгэж, үүндээ зохих албаныхныг татан оролцуулахыг эрмэлзэж байгаа гэнэ. Мөн албан бичгийн хариуг ч ил тодоор мэдээлнэ гэлээ.

Нийслэлчүүд бид аливаа газрын наймаа, иргэдийн эрх ашгийг хөндсөн ээдрээтэй асуудлуудаас булзаж сурсан нийслэлийн үе үеийн удирдлагуудтайгаар өнөөдрийг хүрээд байгаа. Харин энэ удаа ноён Г.Мөнхбаяр энэ асуудалд хэр шудрага хандах бол. Асуудал хаашаа эргэх бол гэдгийг анхааралтай харж сууя.

О.Ариунбилэг /ariunbileg@gogo.mn /