Тагнуулыг гартаа авсан нь

Н.Энхбаяр бүх эрх мэдлийг гартаа авмагцаа түүнийгээ ганцхан эхнэртэйгээ л хуваалцсан байдаг юм. Хамгийн түрүүнд эхнэрээ өөрийн элч болгон ТЕГ-т зөвлөхөөр илгээв.

ТЕГ-ыг удирддаг хөгшин хурандаа нарыг хуралдаж байхад нь зөвлөх О.Цолмон анх удаа явж оржээ. Цаадуул нь болзолт рефлексээрээ давхийн босоцгоож ёсложээ. Зөвлөх үүрэгдэж эхлэв. Тэр лав л "казино"-гийн болон бас бус хэрэгтэй холбоотой материалуудтай танилцана гэж шаардсаар авчээ. Тэр материалуудтай тухтай долоо хоног "танилцаад" "зөвлөх"-ийн ажлаасаа "уйдаж" ажлаа солив. Хөгшин хурандаа нар ёслочихоод Цолмонг гарсаны дараа "Ингэхэд бид хэнд ёслочихов?" гэлцэж.

Тэд О.Цолмонгийн шаардсан материалуудыг өгчихөөд ямар ямар материалыг авч танилцаж, тэндээс ямар хэсэгүүд нь алга болсон тухай рапорт бичин шинэ хавтаст хэрэг нээхээ мартсангүй. О.Цолмон үүний дараа МАХН-ын Удирдах зөвлөлийг хянадаг ажил эрхэлдэг төдийгүй УИХ-ын гишүүд ч түүний эрхлэх ажлын хүрээнд багтсан юм. Тэр бараг орой болгон УИХ-ын гишүүдийг ганцаарчлан гэртээ урьж цайлж дайлангаа "Ийм обьектийг тийм хүнд хувьчлахад та нөлөөл, ийм хөрөнгийн асуудлыг шийдэхэд та тусла" гэх мэтээр шахаж дарамталдаг байжээ. Яг эндээс Ц.Нямдоржтой холбоотой маш нууц зэрэглэлийн тагнуулдын 45 хуудас материал гарсан гэж таамагладаг юм. Үүгээр хожим Н.Энхбаяр Ц.Нямдоржийг дарсан тухай энэ бүлгийг эхлүүлсэн билээ.

Ер нь О.Цолмонтой шөргөөцөлдсөн хүмүүс эрхбиш ард түмнээс сонгогдсон УИХ-ын гишүүн л биш бол ажлаа өөрчлөх нь хэвийн үзэгдэл юм. УИХ-ын хамгийн залуу гишүүн У.Хүрэлсүхийн ээлж иржээ. Түүнийг урьж ирүүлээд Залуучуудын байгууллагынхаа гол албан тушаалын нэгийг хамаатныхаа хүнд авч өгөх гэж шахжээ. У.Хүрэлсүх би ганцаараа шийдэхгүй гэж бултжээ. Шахалт амжилтгүй болмогц О.Цолмон нөхөртөө алтан хошуу өргөжээ. Нөхөр нь ч утсаа шүүрч аваад "Чи манай эхнэртэй яаж харьцаж байгаа чинь энэ вэ? Үүнийг чинь надад хэрхэн ханддагийн чинь илэрхийлэл гэж ойлгож байна" гэж дарамталжээ. Нас залуу, шартай У.Хүрэлсүх маргааш нь болсон намын удирдлах зөвлөлийн хуралд халамцуухан ирээд "Төрийн ажлыг та явуулдаг юм уу, танай эхнэр явуулдаг юм уу гэж" үг хаячихаад хэд хоног утсаа салгаад алга болов. Энэ хурал дээр халуухан юм болж, У.Хүрэлсүхийн үгэнд ичиж, уурласан Н.Энхбаяр "Би тэгвэл огцроод өгье л дөө" гэж тунирхжээ. УИХ-ын даргын асуудлаас болж битүүхэн юм санаж явсан Ө.Энхтүвшин "Тэгвэл та намын их хурлаа зарлачихгүй юу, тэгээд шийдчихье" гэж томорчээ. Энэ өсөрхөл их хол явсан даа. Үүнээс зургаан жилийн дараа 2007 онд Н.Энхбаяр У.Хүрэлсүхийг "Хадгаламж" банкны 14.2 тэрбумын хэргээр золтой л аавынх руу илгээчихээгүй юм. Үнэхээр зуумхай, холын хонзонтой эр.

Н.Энхбаярыг унагах оролдлого - 3

Улс төр гэдэг мөнхийн өрсөлдөөний талбар. Хэдийгээр түүнтэй эн зэрэгцэхүйц, түүнээс тохой илүү өрсөлдөгчид нь хорвоогийн мөнх бусыг үзүүлсэн ч гэсэн шинэ хүчтэй өрсөлдөгчид төрөн гарсаар байв. Сангийн сайд Ч.Улааны ЗГ-т эргэлт хийх гэсэн оролдлого үүнийг батална.

Ерөнхий сайдын нэр хүнд эрс унаж, сэтгэл санаа нь хямарч эмчлүүлэхээр хэвтсэн үед тэр "ордны эргэлт" хийх гээд бүтэлгүйтсэн юм. Эмнэлэгт Ерөнхий сайд дээрээ виски барьж очоод "Одоо та эртхэн боль, би Ерөнхий сайд хийе" гэж шуудхан хэлсэн гэдэг. Харин Ерөнхий сайд эмчилгээгээ гүйцээлгүй шууд гарчээ. ЗГ-ын гишүүдийн цөөнгүй нь Ч.Улаантай хуйвалдсан байсан гэдэг юм. Тэд л арай зоригтойгоор нь Ч.Улааныгаа урдаа оруулаад явуулчихсан бололтой юм. Тэр цагаас Н.Энхбаяр Ч.Улааныг хавчиж эхэлжээ.

Дараа нь Ч.Улаан шазруун зангаараа хариугаа авах гэж "Монгол банкны баримтаар "Аалзны тор" цувралыг эхлүүлэх захиалга өгч, Ерөнхийлөгч дээр ЗГ-ын нэр хүндэд тун таагүй нөлөөлж болзошгүй ОУВС-гийн хөтөлбөрийн тухай, Шанхайн групптэй холбоотой 130 сая долларын ноцтой баримтуудыг барьж ороод "25-р суваг", "Монгол таймс"-аар ноцтой мэдээлэл цацуулж чадсан юм. Одоо болтол ОУВС-гаас Монгол хэрэгжүүлэх ёстой 2003 оны хөтөлбөр батлагдаагүй байгаа нь "Сиамын ихрүүд"-тай холбоотой. О.Чулуунбатын "Үнэн" сонинд нийтлэгдсэн "ОУВС-тай сангүй болно" гэсэн давилуун мэдэгдлээс энэ бүхэн эхтэй.

Тэр өөрийн бодитой өрсөлдөгчийг хожим М.Энхболд гэж харж байгаагаа илрүүлж байв. Түүнээс ажил гуйж очсон ардчилсан намын хэвлэлийн салбарын нэг нөхрийг "Чи Н.Багабанди, М.Энхболд нарыг муулсан материалыг сонинуудаар тараагаад ир, түүний чинь дараа чамайг ажилд авъя" гэж хэлж байсан гэдэг юм. Харин өнөөх нь тийм муухай юм хийхгүй гээд тэр чигт нь орхижээ.

Н.Багабандийг бол яагаад тэгсэн нь ойлгомжтой. Идсэн уусан, буруу ажилласан өчнөөн шүүмжлэл эрх баригчдын нэрийг унагахад Н.Багабанди "Юм үзээгүй, төрийн өндөр алба хашиж сураагүй юмнууд ийм л заваан юм хийж байгаа шүү дээ" гэж зэвүүцсэнээ нуулгүй хэлсэн гэдэг. Тиймээс ч өөрийн шугамаар эрх баригчид гэдэг категорийг Ерөнхийлөгч ба ЗГ гэж тусад нь хэлж, бичүүлэх арга хэмжээ авсан гэдэг. Ямар боловч хэвлэлүүд тэр үед МАХН-ын эрх баригчид гэж биш Засгийн газар гэж тусад нь шүүмжилдэг болоод байсан юм.

УИХ дотор ч, Засгийн газрын кабинетад ч Энхбаярын эсрэг бүлэглэлүүд үүссээр ч байсан. Тэд ихээхэн хохирол амссаны эцэст 2004 онд ялагдсанаар нь шалтаглаж 2005 онд Ерөнхийлөгчийн сонгуульд нэр дэвшүүлж байж арай гэж нэг юм салсан билээ.