Нэг хэсэг монголчууд Бүгд найрамдах Чех улсад (БНЧУ) хөдөлмөр эрхлэх гэж виз хүсэмжлэн Монгол дахь Элчин сайдын яамны өмнө өлсгөлөн зарлаж байсан. Харин эдийн засгийн хямралтай байгаа өнөө үед гадаадад ажиллах хүч гаргахгүй байгаа талаар тус улсын Элчин сайдын яамныхан албан ёсоор мэдэгдэж байна.
Учир нь 2007-2008 онд БНЧУ-д хөдөлмөр эрхлэх зорилгоор шилжин ирэгсдийн тоо эрс нэмэгдсэний дотор монголчууд ихэнх хувийг эзэлж байсан гэдэг. БНЧУ-ын Хөдөлмөр, нийгмийн халамжийн яамны гаргасан дүнгээр 2007 оны аравдугаар сарын байдлаар Чех дэх монгол ажилчдын тоо 5500 гарсан. Харин Чех дэх Монголын Элчин сайдын яамныхны мэдээлснээр тэндхийн монгол ажилчдын тоо 12 мянгад хүрч байгаа гэнэ.
Энэхүү шилжилт хөдөлгөөний давлагааны үр дүнд БНЧУ дэлхийд хамгийн их монголчуудтай орнуудын гуравдугаарт, Өмнөд Солонгос болон, АНУ-ын дараа оржээ.
Сүүлийн үеийн мэдээллээр БНЧУ-д 440 мянган гадаад иргэн хөдөлмөр эрхэлж байгаа ч дэлхийн санхүүгийн хямралд өртөж, орон даяар үйлдвэр компаниуд орон тооны цомхотгол хийж байгаа. Хамгийн их хүнээ цомхтгож байгаа газруудад машины үйлдвэр, эд анги нийлүүлэгчид болон хэрэглээний электрон бараа үйлдвэрлэгчид байгаа нь тэнд ажилладаг монголчуудын хувьд хүнд цохилт болж байгаа гэнэ.
Тус улсын эдийн засагчдийн үзэж буйгаар энэ оны хавар санхүүгийн хамгийн хүнд үе болох учраас үйлдвэрүүд бүр ч ихээр ажилчдаа халах төлөвтэй байгааг анхааруулсан байна. Тиймээс Прага хот дахь Олон улсын хүн амын шилжих хөдөлгөөний байгууллага БНЧУ-д хөдөлмөр эрхлэх сонирхолтой монгол иргэдэд хандан "хэдэн cap хүлээзнэж, Чехийн эдийн засаг болон ажлын зах зээлд санхүүгийн хямрал хэрхэн нөлөөлөхийг харахыг зөвлөж байна" гэжээ.
Иймд тус байгууллага, монголын Засгийн газрын зүгээс БНЧУ-руу ажилд зуучлагч хувь хүн болон байгууллагуудын үйл ажиллагаанд хянамгай хандаж, тэдний олгож буй мэдээллүүдийг сайтар шалгаж үзэхийг ард иргэдэд анхааруулж байна. Эс бөгөөс төрөл бүрийн зуучлагчаар дамжин Чехэд ирснийхээ дараа ажлын байргүй болсноо мэдэн хууртагдах аюултай гэнэ.
