Энэ сарын 17-ны өдөр БНСУ-ын иргэнийг барьцаалж, амь насанд нь халдахыг завдсан хэрэг гарлаа. Тодруулбал, БНСУ-ын иргэн, эмэгтэй К гэгчийг хэсэг бүлэг этгээд барьцаалсан бөгөөд барьцаалсан хүмүүсийг Т.Таня гэх эмэгтэй хөлсөлсөн гэж хохирогч Г мэдүүлжээ. Эх сурвалжийн мэдээлснээр хохирогч К нь эмчилгээ хийлгэж байгаа аж.
Хохирогч К-г компанийхаа хамгаалалтын албаны дарга, орчуулагч хоёртойгоо Дархан-Уул аймгаас Улаанбаатарыг зорин явж байхад 35-79 УНТ улсын дугаартай "Ланд круйзер", "70-57" УНҮ улсын дугаартай "Делика" хоёр машин шахаж зогссон байна. Улмаар дотроос нь 15-16 залуу гарч ирэн, үг хэлэхийн завдалгүй К-гийн биед гэмтэл учруулж, хамгаалагчийг нь зодож, сүрдүүлж эхэлжээ. Тэднийг хөлсөлсөн гэх Т.Таня гэх эмэгтэй хохирогчид хандаж "Уурхай руу явж хамгаалагчдаа татаж ав. Тэгэхгүй бол хээр аваачиж алаад булна" гэж сүрдүүлсэн байна. Гэвч орчуулагч эмэгтэй нуусан утсаараа цагдаад мэдэгдсэнээс Дархан-Уул аймгийн наана байрлах Баянгол сумын цагдаа нар ирж тэдгээр залуусыг саатуулжээ.
Одоогийн байдлаар Т.Таня гэх эмэгтэйг саатуулан харин хүн барьцаалсан гэх залуус суллагдсан байна. Т.Таня гэх эмэгтэй нь Зохион байгуулалттай гэмт хэрэгтэй тэмцэх газрын Эдийн засгийн гэмт хэрэгтэй тэмцэх хэлтэст шалгагдаж байгаа нэгэн аж.
Б.Анир