2 настай мэт “гацсан” 19 настай охин

Энэтхэгийн 19 настай энэ охин маш ховор тохиолдох хөгжлийн гажгийн улмаас хоёр настай хүүхэд мэт бие бялдартай болсон байна. Тэрээр хэвийн байдалтай сууж ч чаддаггүй учраас ээж нь байнга түүнд тусалдаг аж.

Энэтхэг охин Гирлижа Шринивасыг анх харахад яг л бяцхан хүүхэд мэт санагдах хэдий ч тэр аль хэдийн 19 насанд хүрчээ. Энэхүү ховор өвчний улмаас тэр дөнгөж 12 кг жинтэй байгаа нь хэвийн өсөлттэй хоёр настай хүүхдийн хэмжээнд байна гэсэн үг юм.

Түүний толгой нь биеийн бусад хэсэгтэй харьцуулахад хэт хүнд жинтэй учраас хэвийн байдлаар суухад хүндрэл үүсдэг бололтой. Тэрээр аягатай кофеноос өөр зүйл бараг дийлж өргөдөггүй ба хэрэв толгойгоо хүчтэй эргүүлбэл хүзүү нь хугарах эрсдэлтэй талаар эмч нар анхааруулсан байна.

Энэ өвчний улмаас Гирлижа гэр орны хамгийн энгийн ажлыг ч гүйцэтгэж чаддаггүй тул ээж нь түүнд 24 цагийн турш санаа тавин асардаг аж. Гэвч охин энэ байдалдаа тийм ч амархан бууж өгөхийг хүсэхгүй байгаа бөгөөд зураач болоод өөрийн эцэг эхдээ санхүүгийн талаар туслах болно хэмээн мөрөөддөг гэнэ.

Д.Билгүүн