Өнгөрөгч сарын 31-нээс нийт нутгаар цасан шуурга шуурч, авто замд хальтиргаа гулгаа үүсч, үзэгдэх орчин хязгаарлагдаж, замын хөдөлгөөний нөхцөл байдал хүндэрсэн билээ. Байгалийн онц ноцтой үзэгдэл болно, цасаар шуурна гэж телевиз, радио гээд бүхий л хэвлэл мэдээллийн хэрэгслээр хангалттай мэдээлээд байхад хэнэггүй нэг нь яг энэ цасан шуурганаар замд гарч, алсыг зорьсон байх юм.Энэхүү байгалийн онц ноцтой үзэгдлийн улмаас олон зам даваа хаагдаж, 138 хүн төөрч сураггүй алга болж үндэсний хэмжээний гамшиг болж хувирлаа. Цасан шуурганы улмаасхоёр хүн харамсалтайгаар амиа алдаад байна.

Харин ОБЕГ-ын эрлийн баг шуурхай ажиллаж 134 хүнийг цаг алдалгүй хайж эсэн мэнд олсон гэх баяртай мэдээ дуулдавч эргээд энэ бүхний цаана бидний тайван зангаас үүдэж олон хүний эрүүл мэнд, эд материал үрэгдсэн гэдэг нь ойлгомжтой.

Уул нь эрс тэс уур амьсгалтай манай улсын хувьд энэ мэтийн байгалийн үзэгдэлд урьдаас сэрэмжтэй хандаж, урьдчилан сэргийлж, иргэд бүр сонор сэрэмжтэй байж чадвал хохирол багатай давах боломжтой юм шиг санагдах юм. Гэтэл анхааруулж, сануулсаар байтал аян замд гарч, автомашинаа цасанд хучуулах хэмжээнд хүрч байгаа нь дэндүү гэхэд дэндүү ухамсаргүй үйлдэл мэт.

Хил даван урсан одсон эх хүү хоёрыг монголчууд мартах учиргүй. Өөрөө бяцхан хэрнээ дүүгээ дааруулахгүйг хичээж бүх л хувцсаа тайлж хучаад амиа алдсан охиныг өдгөө эсэн мэнд үлдсэн дүү болон эцэг эх нь л санаж дурсах учиргүй. Байгалийн гамшигт монгол хүний тайван зангаар хандаж өөрийгөө ч өрөөлийг ч эрсдүүлэх аюулд унахгүйн тулд одоо хариуцлагатай л байх хэрэгтэй.

Өдөртөө жилийн дөрвөн улирлын өнгө үзүүлэх хаврын эхэн сарын өвөл ч ороогүй энэхүү их цастай эдгээр өдрүүдийг нийслэлчүүдийн хувьд энд тэнд осол аваар гарлаа гэх мэдээлэлд дасан зохицож, давхар олон хүний ажлыг нэмэгдүүлж өнгөрүүлсэн юм.

Ниргэсэн хойно нь хашгирав гэгчээр хэн нэгнээсээ бурууг хайж, хожим сүүлд харууслын үгс чулуудаж суусаар байх юм бол монголчууд бидэнд энэ байдал гэм биш зан болох вий.

Д.Уянга