ОХУ-ын Санкт-Петербург хотод Дэлхийн тулааны спортын II наадамд оролцсон манай эмэгтэй баг тамирчид хүрэл медаль хүртжээ. Манай улсаас энэ удаагийн наадамд жүдо, сүмо, муай-тай боксын төрөлд оролцож байгаа бөгөөд тэмцээний хоёр дахь өдөр ийнхүү медаль хүрсэн байна.

Тэмцээнд энэ жилийн дэлхийн аварга М.Уранцэцэг (52 кг), ОУХМ Д.Сумьяа (57 кг), Ц.Цэрэннадмид (63 кг), Ц.Наранжаргал (-70 кг), Б.Мөнхтуяа (+70 кг) нар хүч үзжээ. Маргааш манай эрэгтэй жүдочид барилдана. Эрэгтэй баг маань тус наадмыг зохион байгуулагч орон ОХУ-ын багтай эхний даваанд оноолт таарчээ.

Хоёр дахь удаагийн энэхүү  наадамд дэлхийн 140 гаруй орны 1500 гаруй тамирчин спортын 15 төрөлд өрсөлдөж байгаа юм.