Саяхан буюу өнгөрсөн сарын 29-нд уламжлал ёсоор зохиогддог “Селигер” залуучуудын чуулганд оролцохдоо хэлсэн Путины айхтар үг үүнийг сануулав.

Путин дээрх чуулганд оролцож, орос залуусын төлөөлөлтэй уулзаж ярилцахдаа, тусгаар тогтносон Казахстан улсын талаар тун эвгүй үг хэллээ. Тэрээр Казахстаны ерөнхийлөгч Нурсултан Назарбаевыг “урьд нь ямар ч улс оршин тогтнож байгаагүй нутаг дээр улс байгуулсан” онцгой хувьтай хүн хэмээн хэлсэн нь ажиглагчдын анхаарлын татаж байна. Тэдний үзэж буйгаар, Казахстанд өгсөн Путины энэ анхааруулга Назарбаев Украйн, Европын Холбооны хооронд байгуулагдах гэрээг дэмжсэнээс үүдэлтэй ажээ.

Казахстан нь байгуулагдаад 20 гаруй жил болж буй Төв Азийн залуу улс юм. Энэ улс Оросоос хараат оршдог. Гэвч сүүлийн үед Хятадын нөлөөнөөс ихэд эмээх болсон тус улс олон тулгуурт гадаад харилцааг хөгжүүлэхээр чармайж буй. Хэдийгээр Казахстан нь өнөөдөр улс төрийн хувьд тогтвортой мэт боловч өнөөгийн өвгөн удирдагч, “улсын эцэг” Н.Назарбаевын дараа ямар нөхцөл байдал үүсэхийг хэлэхэд хэцүү. Энэ улсад бусад Төв Азийн улсуудын адил лалын хэт даврах үзэл нэвтэрсний сацуу умард нутгийн орос хүн амын дунд салан тусгаарлах үзэл бий. Хэдэн жилийн өмнө Казахстанд салан тусгаарлах үзэлт оросуудыг баривчлах ажиллагаа явуулж байсан. Иймд Казахстаныг Украйны адил орос гаралтнууд салан тусгаарлах үзлийг дэвэргэх аюултай улс гэж үздэг байна.