Дэлхийн хөлбөмбөгийн түүхэнд төрөн гарсан хамгийн агуу шигшээ багуудын нэгт зүй ёсоор тооцогдох Испаний шигшээгийн нэгэн үе ийнхүү хамгийн сүүлийн тэмцээнээ өндөрлүүлж байна. Луйс Арагонес 2008 оны Еврод түрүүлсэн багийг Барселона клуб дээр суурилан бүрдүүлж, түүний залгамжлагч Висенте Дель Боске 2010 оны Дэлхийн аварга, 2012 оны Европын аваргын тэмцээнүүдэд дарааллан түрүүлж байсан билээ. Ийм тасархай амжилтыг өмнө нь ямар ч баг үзүүлж байсангүй.

Ямар ч багт эрч хүч, ялалтаар цангах гэдэг маш том асуудал болдог. 3 том тэмцээнд дарааллан түрүүлсэн багийн уур амьсгалыг өмнөх шиг нь хадгална гэдэг үнэхээр хүнд гэдэг нь ч тодорхой. Хэдий тэмцээн бүрт шигшээд шинэ тоглогчид орж ирэн, цус сэлбэж байсан ч тэр нь энэ удаад хангалттай байсангүй.

Икер Касильяс, Шави Эрнандес, Шаби Алонзо гээд олон тоглогчийн хувьд энэ тэмцээн тэдний карьерын сүүлийн дэлхийн аварга болж байна. Нэгэн үе дэлхийн хөлбөмбөгийн өнгийг тодорхойлж байсан эдгээр тоглогчдыг энэ тэмцээнд бүтэлгүйтэхийг харан, харамсан суухыг харах ямар ч фанатад хэцүү байсан нь тодорхой.

Чилийн шигшээ багийн энд магтая. Марсело Бьелсагийн удирдсан Чилийн шигшээ өнгөрсөн дэлхийн аваргад үзүүлж байсан аюултай сөрөг довтолгоо, аймшигтай хурдтай тоглолтоо улам төгс болгож, Испаничуудыг төвөггүйхэн буулгаж авлаа. Эхний гоолд тэдний довтолгооны бүх тоглогчид оролцож, бүгд өөрсдийн үүргээ гүйцэтгэн, Х.Варгас тооны харьцааг нээсэн юм. Испаний шигшээ багийн хамгаалалт тэдний замбараагүй гүйлтийн учрыг олж чадсангүй.

2 дахь гоол эхний үе дуусахаас өмнө орсон. Алексис Санчесийн хийсэн хаалттай цохилтыг И.Касильяс хаасан ч ойж ирсэн бөмбөгийг хааж чадсангүй. Зөв газраа, зөв цагтаа байсан Арангуиз хоншоороороо цохисон цохилтоороо тооны харьцааг 2:0 болгожээ. Энэ бол Испаний эрин үе өндөрлөхийн дохио болсон, түүнийг баталгаажуулсан гоол болсон билээ.

Хэдий Дель Боске хэд хэдэн зоримог шийдвэр гаргаж бүрэлдэхүүнээ багагүй өөрчилсөн ч тэр нь хангалттай байсангүй. Төвийн хамгаалалтанд Пикегийн оронд Байерны Хави Мартинезыг гаргасан бол Шави Эрнандес сүүлийн жилүүдэд бараг анх удаа сэлгээнд суусан нь онцлохоор байлаа. Сэлгээгээр Коке, Касорла, Торрес нар гарч ирсэн ч тэр нь хангалттай байсангүй.

Испаний эрин энд ирээд өндөрлөлөө. Дэлхийг донсолгож, 6 жилийн турш байлдан дагуулсан Испаний шигшээ баг ийнхүү гэртээ харих боллоо. Баяртай, Ялагдашгүй Армада!

ОНЦЛОХ МӨЧ

Тоглолтын төгсгөл хэсэг. Нэгэн үе дэлхийг донсолгож, ямар ч багийг өөрийн тоглолтдоо оруулан хожиж, давамгайлж явсан Испаний шигшээ багийн уналт нүдэн дээр өрнөх тэр мөч. Өмнөх ДАШТ-д Швейцарийн багт эхний тоглолтдоо хожигдсон ч дараагийн тоглолтууддаа нэг ч ялагдалгүй, нэг ч гоол алдалгүй явсаар түрүүлсэн тэднийг энэ удаад ч үүнийгээ давтах болов уу гэж олон хүн найдаж байсан нь тодорхой. Дараагийн тэмцээнд хангалттай хэмжээнд шинэчлэгдсэн шигшээ баг ирж, бүр улам амжилт үзүүлэх нь тодорхой биз ээ.

ОНЦЛОХ ТОГЛОГЧ

Икер Касильяс. Сайн биш муу талаараа. 2 гоолд 2-ууланд нь түүний буруу шийдвэр багагүй нөлөөлсөн. Эхний гоол дээр Варгасд тийм амархан даруулж хуурагдана гэдэг, 2 дахь гоол дээр Санчесийн цохилтыг тийм "сонин" хатгана гэдэг дэлхийн шилдэг хаалгачдаас гарамгүй шийдвэрүүд байлаа. Эхний тоглолтонд нэлээдгүй зэмлэл хүртсэн түүний хувьд энэ нь магадгүй шигшээдээ хийсэн хамгийн сүүлийн тоглолт нь ч байж мэдэх юм.

ОНЦЛОХ СТАТИСТИК

ДАШТ-ий өмнө хамгийн их анхаарал татаж байсан Испаний шигшээгийн довтлогч Диего Коста тоглолтын турш ердөө 21 удаа л бөмбөгөнд хүрчээ.