Нийслэлийн СХД-ийн нутаг дэвсгэрт байрлах “Москва” хорооллын 9-р байрны тоосго энэ сарын 11-ний өдөр их хэмжээгээр нуржээ. Мэргэжлийн хүмүүс тоосго нурсан шалтгааныг өрөлтийг буруу хийснээс үүдсэн гэж тодорхойлоод байгаа аж.

Тоосго нурах үед азаар хүний эрүүл мэнд хохироогүй ч энэ байдлаараа арга хэмжээ авалгүй хугацаа алдвал  дахин нурах аюултай байдалд байгааг хэлжээ.

Есдүгээр байртай зэрэг буюу 2010 онд ашиглалтанд орсон долоо, наймдугаар байрууд ч бага хэмжээний нуралт өгч байсан байна. Москва хорооллын нэгдүгээр ээлжийн барилгыг оросууд барьсан бол нураад байгаа хоёрдугаар ээлжийн барилгыг хятад ажилчид барьсан гэсэн мэдээлэл байгаа ажээ.

Хэвлэл мэдээллийн байгууллагууд дээрх мэдээллийг тус хорооллын “Сууц өмчлөгчдийн холбоо”-ноос тодруулахыг хүссэн ч татгалзсан хариу өгчээ. Оршин суугчдын ярьж байгаагаар бол “Москва хороолол”-д өнгөлгөөний шавар нь хагарч, ан цав гарсан өөр олон барилгууд байгаа аж.  

Х.Болор
    

Эх сурвалж: www.mminfo.mn