Монгол, Японы хооронд дипломат харилцаа тогтоосны 40 жилийн ойг тохиолдуулан хоёр орны харилцааг өргөжүүлэн хөгжүүлэхэд үнэтэй хувь нэмэр оруулсан хувь хүн, байгууллагад Япон улсын Гадаад хэргийн сайдын нэрэмжит болон манай улсад суугаа Онц бөгөөд Бүрэн эрхт Элчин сайдын нэрэмжит өргөмжлөл гардуулах ёслол өчигдөр боллоо. Элчин сайд Такэнори Шимүзү энэ үеэр “Хоёр орны хамтын ажиллагааг эрчимтэй хөгжүүлэхэд хоёр орны иргэд, байгууллагуудын хувь нэмэр их юм. Эдгээр хүмүүсээр дамжуулж Монголын иргэд манай орны талаар илүү ихийг мэдэх болсон.

Манай улсад тохиосон цунамигийн үед анд нөхдийн ёсоор тусламж үзүүлсэн нь та бүхний ач гавьяа юм. Бидний баярласан талархсан сэтгэлийг хүлээж авбал бид туйлын их баярлах болно” хэмээв. Тэрбээр Япон улсын Гадаад хэргийн сайдын нэрэмжит өргөмжлөлийг япон хэлний орчуулагч Д.Төмөрбаатарт гардуулав. Мөн Их засаг их сургуулийн захирал Н.Ням-Осор, Улсын филармонийн дарга Ч.Даваасүрэн, “Цагаан хус” нийгэмлэгийн тэргүүн Г.Янжинлхам, “Орхон” дээд сургуулийн захирал Н.Хажидсүрэн нарт Элчин сайд нэрэмжит өргөмжлөлөө хүртээв. Дээрх хүмүүс нь Монгол, Японы харилцааг дэмжих “Түншийн холбоо” нийгэмлэгийн гишүүд аж.

Мөн Монголын Икэбанагийн, Кэндогийн, Кэндамагийн, Оригамигийн, Жүдо бөхийн холбоо болон Дархан-Уул аймгийн “Наран” сургууль, Монголын хүүхдийн ордны төлөөлөгч нар өргөмжлөлийн эзэн болов. “Цагаан хус” нийгэмлэгийн тэргүүн Г.Янжинлхам “1998 оноос хоёр орны эдийн засаг, хамтын ажиллагааны төвийн төлөөлөгчөөр ажилласан. Энэ хүрээнд ТББ, хүүхэд, эмэгтэй чүүдэд чиглэсэн олон ажил хийсэн. Өчүүхэн ажлыг маань үнэлсэнд баяртай байна” гэж хэллээ.