Чих, хамар хоолойн ЭМЖЖ төвийнхөн төрөлхийн дүлий хүүхдэд сонсгол оруулах дунгийн суулгацын хагалгааг орчин үеийн аргаар амжилттай хийлээ. Энэ сарын 17-нд хоёр, долоон настай хүүхдүүд ийм хагалгаанд оржээ. Тус төвийнхөн төрөлхийн болон олдмол дүлий хүүхдэд сонсгол оруулах хагалгааг 2009 оноос хийж эхэлсэн, энэ нь тэдний 12-13 дахь хагалгаа аж. Энэ удаагийн мэс заслын арга нь гэмтэл бага учруулдаг, алдаа маш бага заадаг шинэ технологи бөгөөд манай эмч нар энэ хагалгааг Азид анх удаа нэвтрүүлжээ.

Мэс засалд орсон хүн урьд нь хагалгаанаас хойш нэг сарын дараа анхны чимээг мэдэрдэг байсан бол одоо хагалгаа хийсний маргаашнаас чимээ мэдэрч, үр дүнгээ өгч байна. Уржигдар хагалгаанд орсон хүүхэд өчигдөр чимээ мэдэрчээ. Европт нэвтрээд хэдхэн сар болж байгаа дунгийн суулгацын хагалгааны талаар тус төвийн мэс заслын эмч Д.Жаргалбаяраас тодрууллаа. Тэрбээр энэ чиглэлээр БНСУ-д мэргэжил дээшлүүлээд иржээ. Тус төвийн эмч, профессорууд Хятад, Солонгос, Герман, Австрали, АНУ-д суралцсан байна.

-Дунгийн суулгацын хагалгааг гурван жилийн хугацаанд яагаад ийм цөөхөн хүүхдэд хийсэн бэ?

-Хүмүүсийн эдийн засгийн боломжоос л шалтгаалж байна. Энэ бол өртөг өндөртэй, эрхтэн шилжүүлэн суулгахтай дүйцэх хагалгаа л даа. Сонсох мэдрэлийн эсүүд ажиллахгүй байгаа нөхцөлд түүнийг орлож чихэнд сонсох тусгай төхөөрөмжийг мэс заслын аргаар суулгадаг. Энэ хагалгаа хийлгэсэн бол насан туршдаа сонсголтой болно. Эрүүл мэндийн яам, ЭМЖЖ төв, Австралийн “Кохлер” фирмийн 2010 онд хийсэн гурвалсан гэрээгээр Монгол Улсад дунгийн суулгацын хагалгаа хийлгэх эхний 50 хүүхдэд сонсох төхөөрөмжийг (имфлантыг) хөнгөлөлттэй үнээр суулгаж өгч байгаа. Энэ төхөөрөмжийн үнэ дэлхийн зах зээл дээр 29500-33000 ам.доллар. Гэрээний дагуу эхний 50 хүүхдэд 19500 ам.доллараар хагалгаа хийлгэх боломжтой. Гадаадад энэ хагалгааг хийж байгаа. Мэс заслын өртөг өндөр, дээр нь хагалгааны дараа олон жил эмнэлгийн хяналтад байх шаардлагатай. Мөн нөхөн сэргээх эмчилгээ хийлгэх хэрэгтэй болдог. Энэ хагалгааг Монголдоо үргэлжлүүлэн хийх тоног төхөөрөмж, багаж хэрэгслээр манайх бүрэн хангагдсан.

-Дунгийн суулгацын хагалгааг яагаад голдуу хүүхдэд хийдэг вэ?

-Энэ хагалгааг аль ч насныхан хийлгэж болно. Яагаад хүүхдийг онцолдог вэ гэхээр 2-3 настай хүүхдэд хагалгаа хийвэл дараагийн 2-3 жилд хэл заслын хичээлд яваад, зургаан нас хүрч сургуульд орохдоо эрүүл хүүхдийн адил болсон байдаг. Тэгвэл нас ахих тусам нөхөн сэргээх, хэл заслын хичээл заахад түвэгтэй. Хэдийнэ дохиогоор яриад сурсан хүний шинэ зүйлийг хүлээн авах чадвар муудсан байдаг. Тэгэхээр аль болох багад нь мэс засал хийлгэвэл илүү үр дүнтэй. Харин гэмтлийн гаралтай, хүнд өвчний улмаас, эмийн зохисгүй хэрэглээнээс болж дүлийрсэн хүн бол энэ хагалгааг хийлгэвэл шууд сонсгол орно.

-Манайд сонсголын бэрхшээлтэй хүн олон байдаг уу?