Аки башёгийн ес дэх өдөр ёкозүна Хакүхо маэгаширагийн дөрөв дэх бөх Точиношинийг ёрикири мэхээр ялснаар тэрг үүлэгчдийн эгнээнд ганцаараа торойн үлдлээ. Учир нь түүнтэй адил найм дараалж ялаад байсан сэкивакэ Кисэносато өчигдөр Барүтод өвдөг шороодсон юм. Кисэносато хэдийгээр унасан ч үлдсэн өдрүүдэд гайгүй барилдчихвал ирэх башёд озэки цолны болзол сонсох юм. Тэрбээр Нагоё башёд 10 давсан билээ. Түүнчлэн өчигдөр Монголын хоёр бөх Харүмафүжи, Какүрюү нар хоорон доо барилдаж, том цолтой нь давснаар тав дахь даваагаа авчээ.

Какүрюүгийн хувьд сүүлийн хоёр башёд 12, 10 давж, озэки цолонд ойртож ирсэн ч боломжоо ашиглаж чадалгүй бүхнийг эхнээс нь эхлэхээр боллоо. Харин маэ гаширагийн аравт бичигдсэн Кёкүтэнхү өчигдөр Дайдог ялснаар долоо дахь даваагаа авч, тавиас дээш хувийн амжилтаа үзүүлэх нь бараг тодорхой болов. Доод зиндаанд барилдаж буй монголчуудаас санданмэгийн Таканаиво 5-0, жониданы Вакамишо 4-0 амжилт үзүүлж, зиндаандаа түрүүлэх боломжтой явна.

Тэдэнтэй адил зуун хувийн амжилттай явсан макүшитагийн Рүю өчигдөр өвдөг шороодсоноор дөрвөн даваа, нэг унаатай болжээ. Макүшитагийн гуравт бичигдэж, цолтой бөх болоход ойртсон Араваши Э.Дөлгөөн өчигдөр учраагаа давснаар 3-2 амжилттай болж, жюүрёод дэвшихэд алхам ойртсон байна.