МУИС-ийг энэ жил 2500 орчим оюутан төгсөнө. Тус сургуулийн Оюутны хөдөлмөр эрхлэлтийг дэмжих төв төгсөх оюутнуудаа ажлын байртай болох, аж ахуйн нэгжүүд МУИС-ийн төгсөгчдөөр хүний нөөцөө бүрдүүлэхэд туслах зорилгоор нийслэлийн Хөдөлмөрийн газартай хамтран өчигдөр “Job fair” өдөрлөг зохион байгууллаа. Өдөрлөгт “Оюутолгой”, “Макс групп”, “Мобиком корпораци”, “Эм Си Эс”, “Голомт”, “Хадгаламж”, ХААН, “Капитрон”, “Хас”, “Худалдаа хөгжлийн банк” зэрэг аж ахуйн нэгж, байгууллага оролцжээ.
Нийт 300-гаад байгууллагын 4000 орчим ажлын байрыг оюутнуудад санал болгосон байна. МУИС-ийн оюутнууд өдөрлөгт идэвхтэй оролцов. 13.00 цагийн байдлаар нийт 2500 орчим оюутан ажлын байрны талаарх зөвлөгөө авч, 1800 гаруй оюутан ажилд бүртгүүлсэн байлаа. Төгсөх оюутнуудаас гадна бусад дамжааныхан цагийн ажил нэлээд сонирхож байсан.
Тэдний нэг МУИСийн Биологи, биотехнологийн сургуулийн гуравдугаар дамжааны оюутан Г.Хулантай уулзлаа. Тэрбээр “Цагийн ажил хийх хүсэл байдаг ч хичээлийн цаг зав тохирч өгдөггүй. Орой хийе гэхээр зөөгчийн ажил л байдаг. Тэр нь бас хүссэнээр олддоггүй. “Оюутан ажиллуулахгүй” гэдэг. Мэргэжлийн ажил бол бүр ч байдаггүй. Туслах бэлтгэгч, бараа зөөгчийн ажил байдаг юм билээ. Харьцангуй хүнд ажил мөртлөө цагийн хөлс нь 500-700 төгрөг. Тиймээс хийх сонирхол төрдөггүй” гэлээ. Харин эрэгтэй оюутнуудад цагийн ажил арай илүү олддог аж.
Гэхдээ л цагийн хөлс нь бага учраас сонирхдоггүй юм байна. Тиймээс оюутнууд цагийн гэхээс илүү зуны амралтаараа ажиллах нь дээр хэмээн үздэг аж. Тус сургуулийн Математик, компьютерийн сургуулийн төгсөх дамжааны оюутан А.Содбаатар “Оюутнууд бид тэр болгон ажлын байр судлаад байж чаддаггүй. Тиймээс өнөөдрийн өдөрлөг бидэнд олон талын зөвлөгөө, мэдээлэл өгсөн хэрэгтэй үйл ажиллагаа болж байна. Би “Голомт” банкинд өргөдлөө өгсөн. Банкны эрсдлийн шинжээчээр ажиллах боломжтой ч төдийлэн элбэг байдаг ажлын байр биш юм байна. Ийм өдөрлөгийг жил бүр хийж байвал зүгээр юм” гэлээ.
