Монголчуудын 35 жилийн турш хүсэн хүлээсэн Чөлөөт бөхийн дэлхийн аварга хэмээх эрхэм цолыг хүртсэн С.Батцэцэг өнөөдөр өглөө эх орондоо ирлээ.

Түүнийг хүрэлцэн ирсэний дараа Монголын чөлөөт бөхийн холбоо, Биеийн тамир, спортын хорооны удирдлагууд хүлээн авч уулзан баяр хүргэсэн юм.

Уулзалтын үеэр Биеийн тамир, спортын хорооны Ч.Наранбаатар “Москва хотноо зохион байгуулагдсан Чөлөөт бөхийн дэлхийн аварга шалгаруулах тэмцээнд аваргын алтан медаль хүртсэн С.Батцэцэг эх орондоо 35 жилийн дараа энэхүү амжилтыг авчирсан нь Монгол улс даяар бахархмаар үйл явдал боллоо. Тэрбээр дэлхийд данстай тамирчин гэдгээ харууллаа” хэмээн бахархан ярьж байв.



Энэ үеэр манай сурвалжлах хэсэг Чөлөөт бөхийн аварга С.Батцэцэгтэй уулзаж хэдэн хором ярилцлаа.

-Монголын эмэгтэй чөлөөт бөхийн тамирчдаас хамгийн анхны дэлхийн аварга цолыг хүртлээ. Тухайн үед сэтгэгдэл ямар байв. Юу бодогдож байсан бэ?
-Монгол хүн болж төрснөөрөө бахархаж, надад итгэл хүлээлгэсэн ард түмэндээ баярлалаа гэж хэлмээр санагдаж байсан. Монголчуудынхаа хүсэн хүлээсэн медалийг авсан болохоор сэтгэл маш их хөдөлж байлаа.

-Тэмцээнд олон орны аваргуудтай хүч үзэж ялалт байгуулсан. Тэр талаараа дурсвал?
-Нэгдүгээр тойргоосоо эхлэн нэлээн туршлагатай олимп, дэлхийн аваргын медальтай тамирчидтай барилдаж эхэлсэн. Эхний тойрогтоо Канадын бөх олимпийн наадмын мөнгө, хүрэл медальт, дэлхийн аваргын хошой хүрэл медальт Тоня Лунн Вервеекийг эхний үед 1:2, хоёрдугаар үед 8:4-ийн онооны харьцаагаар ялж, хоёрдугаар тойрогт Бразилийн бөх Суиза Да Сильваг 4:0, 1:0-ийн харьцаатай оноогоор хожсон. Харин хэсгийн аваргын төлөөх барилдаанд Японы бөх, дэлхийн дөрвөн удаагийн аврага Аяко Шодаг эхний үед 0:2-оор ялж, хоёрдугаар үед 3:3-аар тэнцэж, нэмэлт гуравдугаар үеийн барилдаанд 3:5-ын харьцаатай оноогоор ялалт байгуулсан. Улмаар алтан медалийн төлөө барилдаанд Хятадын бөх, залуучуудын дэлхийн аврага Чжан Ланыг 4:0, 4:0-ийн харьцаатай оноогоор ялж дэлхийн аварга цолыг хүртсэн.

-Монгол эмэгтэй хүн чөлөөт бөхөөр барилдахад ямар онцлогтой байдаг вэ. Өөрийгөө бусад орны тамирчидтай харьцуулж үзэв үү?
-Бусад орны тамирчныг бодвол манай тамирчид илүү бяртай байдаг юм шиг санагдсан. 

-Яагаад заавал чөлөөт бөхөөр хичээллэх болсон бэ?
-Би жаахан байхдаа чөлөөт бөхийн эмэгтэй тамирчдын барилдааныг шимтэн үздэг байсан. Тэд үнэхээр сайн барилдаж аль хэдийнээ амжилт гаргаад эхэлчихсэн байсан болохоор би ч гэсэн сайн тамирчин болъё гэж бодсон.

-Өмнө нь гаргаж байсан амжилтаасаа хуваалцвал?
-2006 оноос эхлэн Дондов багш дээр бэлтгэл хийж эхэлсэн. Улмаар тухайн ондоо Өсвөрийн аварга шалгаруулах тэмцээнээс мөнгөн медаль, 2010 онд азийн аварга шалгаруулах тэмцээнээс мөнгөн медаль тус тус хүртэж, залуучуудын дэлхийн аваргаас шагналт тавдугаар байранд орж байсан.  

-Цаашид өөр тэмцээн уралдаанд оролцох төлөвлөгөө бий юу?
-Одоогоор төлөвлөсөн зүйл алга байна. Багш дасгалжуулагч нартайгаа зөвлөлдөж байж шийдвэр гаргана даа.

-Мэдээж энэ агшинд хэн нэгэнд талархсан сэтгэглээ илэрхийлэх байх?
-Намайг ийнхүү амжилт гаргахад ихээхэн үүрэг гүйцэтгэсэн багш нартаа баярлалаа гэж хэлмээр байна. Мөн хилийн цэргийн 77 жилийн ой тохиож байгаатай холбогдуулан нийт хилчиддээ ойн баярын мэнд дэвшүүлье.  

Үүний дараа дэлхийн аварга маань өөрийн амжилтын гараа болсон бөхийн дэвжээнээ мөргөж адис авлаа.

Чөлөөт бөхийн спортын түүхэнд хамгийн анх Белорусс улсын Минск хотод явагдсан дэлхийн аваргын тэмцээнээс гавьяат тамирчин, Хөдөлмөрийн баатар З.Ойдов, дархан аварга Х.Баянмөнх нар алтан медаль хүртэж байжээ/.

С.Батцэцэгийн хувьд Монголын гурав дахь чөлөөт бөхийн дэлхийн аваргаар тодроод байгаа төдийгүй манай улсын эмэгтэй чөлөөт бөхчүүдээс хамгийн анхны дэлхийн аварга цолыг хүртсэн юм.  

Тэрбээр Москвагийн дэлхийн аваргын дэвжээнд 59 кг-ын жинд хэсгийн аваргын төлөөх барилдаанд Японы бөх, дэлхийн дөрвөн удаагийн аврага Аяко Шодаг эхний үед 0:2-оор ялж, хоёрдугаар үед 3:3-аар тэнцэж, нэмэлт гуравдугаар үеийн барилдаанд 3:5-ын харьцаатай оноогоор ялжээ.

Харин алтан медалийн төлөө барилдаанд Хятадын бөх, залуучуудын дэлхийн аврага Чжан Ланыг 4:0, 4:0-ийн харьцаатай оноогоор ялж дэлхийн аварга цолыг хүртсэн аж.

Түүний энэхүү гавьяа зүтгэлийг өндрөөр үнэлж өнөөдөр Хилийн цэргийн удирдах газраас хоёр өрөө байрны түлхүүр гардуулсан бол Архангай аймгийн Хашаат сумын нутгийн зөвлөлөөс суудлын автомашинаар шагнасан байна.