Moderator: mgl_300
-Түүнтэй хамт бас нэг охин барьцаанд байсан гэнэ-
Өнгөрсөн пүрэв гаригт дөнгөж гэгээ тасарч байв. Баянзүрх дүүргийн Ботаникийн цэцэрлэгийн харалдаа автобусны буудлыг чиглэн 18 настай болов уу гэмээр охин гуйваж ганхсаар гарч иржээ. Тэрбээр цасан дундуур оймстой туучиж явав. Баруун хөлийнх нь оймс сугарч зөвхөн хуруунуудыг нь халхалж байсан гэнэ. Өмднийх нь цахилгаан татагдаагүй, энгэр задгай явсан түүнийг хавь ойрынх нь хүмүүс соггуу хэмээн андуурчээ. Охин дөнгөж хөлд орж буй хүүхэд шиг тэнтэр тунтар алхалсаар замын хажууд зогсон гар өргөв. Таксинд суумагцаа цурхиран уйлж "Ахаа хурдан яваарай. Гэрт минь хүргээд өг" хэмээжээ. Таксины жолооч хэсэг зуур чимээгүй явж байснаа "Хаа хүрэх вэ, гэрээ зааж өг" хэмээжээ. Охин цурхиран уйлсаар байв. Жолооч хэсэг зуур чимээгүй явснаа дахин "Миний дүү битгий уйл. Аав шиг чинь хүн байна. Юу болсон, яасан. Би чамд муу зүйл хийхгүй' хэмээжээ. Охин энэ үгэнд тайвашрч бусдад барьцаалагдсан тухайгаа жолоочид ам нээсэн байна. Жолооч түүнийг Иргэнй бүртгэл мэдээллийн улсын төвийн дэргэдэх цагдаагийн хэсэгт аваачсанаар энэ хэрэг илчлэгджээ. Охин Эрүүл мэндийн шинжлэх ухааны их сургуулийн нэгдүгээр дамжааны оюутан аж. Тэрбээр өнгөрсөн мягмар гаригт хичээлээ тараад гэртээ харих гэж явахад нь хоёр залуу амыг нь таглан машинд суулган авч явжээ. Түүнийг нэг сэрэхэд цагаан халаадтай хүн эм, ус өгсөн аж. Түүнийг нь уугаад охин сэхээтэй, сэхээгүйн хооронд байжээ. Түүнтэй хамт бас нэг охин байсан тухай оюутан цагдаагийнхандмэдүүлсэн байна. Барьцаанд үлдсэн охиныг аврахаар цагдаагийнхан ажлын хэсэг томилон эрэл хийв. Баянзүрх дүүргийн цадаагийн хэлтсийнхэн эрлийг тэр өдрийн 22 цагаас эхэлсэн аж. Оюутан охин Амгалангийн аль гудамжнаас чухам хаана байснаа зааж өгч чадсангүй. Тэр орчимд шөнийн 03 цаг хүртэл самналт, тандалт хийсэн боловч гэмт хэрэгтнүүд болон тэнд үлдсэн охины сургийг гаргаж чадсангүй. Харин маргааш нь гэмт хэрэгтнүүдийн байршлыг тус дүүргийн цагдаагийнхан шуурхай ажилласны дүнд илрүүлсэн байна. Энэ талаар Баянзүрх дүүргийн цагдаагийн хэлтсийн Мөрдөн байцаах тасгийн мөрдөн байцаагчаас тодрууллаа.
-Оюутан охиныг барьцаалсан хүмүүсийг баривчилсан гэж сонслоо?
-Энэ хэргийг бид шалгаж байна. Илрүүлэх шатандаа орсон. Гэхдээ гэмт хэрэгтнүүд хоёулаа юу, хэдүүлээ вэ, охидыг худалдах зорилгоор гудамжнаас хулгайлсан уу гэдгийг тогтоохоор ажиллаж байна. Энэ хэргийг бүлэг зохиои байгуулалттай хэсэг залуус үйлдсэн бололтой. Иймд тэдний нэр усыг дэлгэрэнгүй хэвлэлээр мэдээлэх боломжгүй байна.
-Тэгэхээр охидыг бусдад худагдаалахыг завдсан байж болзошгүй гэсэн үг үү?
-Яг ч тэгж хэлж болохгүй. Тийм байж ч болзошгүй. Бид шалгаж байна.
-БНХАУ руу хулгайлсан охидоо гаргаж байсан гэсэн мэдээлэл бид авсан юм?
-Энэ залуус хулгайлсан охидоо зардаг байсан гэх баримт нотолгоо алга. Хэргийг дөнгөжшалгаж байна.
-Гэмт хэрэгтнүүд өөрсдөө юу гэж мэдүүлэх юм бэ?
-Тэд мөнгө хэрэгтэй болсон. Тэгээд охиныг нь барьцаалаад ээж, ааваас нь мөнгө авах зорилготой энэ хэргийг үйлдсэн гэж мэдүүлсэн.
-Оюутан охинд эм өгч байсан гэсэн. Түүнд мансууруулах үйлчилгээтэй эм өгч байсан юм болов уу?
-Охин өөрөө эм өгч байсан гэж бидэнд мэдүүлсэн. Охин шоконд орсон. Эрүүл мэндийн байдал нь муу байна. Ямар нэгэн хэмжээгээр мансууруулах төрлийн эм хэрэглэж байсан бололтой. Энэ төрлийн шинжилгээ өгсөн. Шүүх эмнэлгээр магадлагаа гаргуулсан.
-Гэмт хэрэгтнүүд ямар ажил эрхэлдэг хүмүүс вэ?
-Тэд тодорхой эрхэлсэн ажилгүй, ойр зуурын наймаа хийдэг бололтой.
-Охиныг чухам ямар газар байлгаж байсан байх юм бэ?
-Тэд охидыг нэгийнхээ танилын хашаанд аваачиж хорьж байсан.
-Охин тэндээс яаж эсэн мэнд мултарсан юм бол?
-Сэрэхэд нь ойр хавьд нь хүн байхгүй байсан гэсэн. Өөрөө мэдүүлэхдээ "Нэг сэрсэн чинь байшин дотор чимээгүй байсан. Жаахан сонсож хэвтсэн чимээ гараагүй. Тэгэхээр нь цүнхээ аваад гараад гүйсэн" гэсэн. Тэгэхэд нэг охин бас тэнд нь байсан гээд байгаа. Өөрөө бол надаас арай жаахан охин байх шиг байсан. Зүс царайг нь хараагүй. Харанхуйд ярьж байхдаа "Эгчээ надад туслаач гээд байсан" гэсэн.
-Тэр охиныг та нар олсон уу?
-Одоохондоо олоогүй байгаа.
-Оюутан охиныг хэд хоног барьцаанд байлгасан юм бэ?
-Охины гэр 32-ын тойрог орчимд байдаг юм билээ. Гэртээ харих гэж явахад нь залуус таараад машинд хийж авч явсан гэсэн. Хоёр өдөр харанхуй өрөөнд хорьсон байсан.
-Ямар нэгэн өс хонзонтой хүмуүс биш байгаа. Охин гэмт хэрэгтнүүдийг өмнө нь таньдаг байсан ч байж болох?
-Охин тэднийг танихгүй гэж хэлсэн. Гэхдээ одоохондоо гүн шоконд орсон болохоор нарийн хэлж чадахгүй байх шиг байна.
-Юутай ч охиныг барьцаалсан нь л одоохондоо тогтоогдоод байгаа юм уу?
-Тийм,
-Ар гэрийнхнээс нь барьцаалаад мөнгө нэхсэн юм болов уу?
-Өөрснөө мөнгө нэхэх зорилгоор охиныг барьцаалсан гээд байгаа.