Алс холын Америкт амьдарч буй гавьяат жүжигчин Н.Батцэцэгтэй цахим шуудангаар холбогдлоо. Тэрбээр  гэр бүлийн хамт Америкт дөрвөн жил болж байгаа бөгөөд “Жинжиймаа” киногоо америкийн зах зээлд гаргасанаас хойш  харьд суугаа монголчуудын  тухай “Үгүйлэн санана” нэвтрүүлэг хийж  үзэгчдийн талархал хүлээсэн юм.

-Сайн байна уу Батцэцэг эгч ээ, баяр наадам сайхан уу? Яаж баярлав даа?
-Сайхаан. Энэ жил Чикагогийн наадам урьд урьдынхаас илүү сайхан боллоо. Наадмын өдрүүдэд эндхийн  цаг агаар таатай,  айраг  цагаа элбэг  байсан шүү.

-Америкт айраг байдаг юм уу?
-Тийм ээ. Монголчууд маань хуурай хөрөнгө авчраад  айргаа исгэдэг юм билээ. Амт нь ялгаагүй яг л гүүний  айраг...

-Танай хотод хичнээн монгол байдаг вэ?
-2000 гаруй монгол хүн бий. Чикагод   ажил элбэг, цалин өндөр болохоор хүмүүс их нүүж ирдэг юм.

-Онлайнаар олныг шуугиулж байгаа  “Үгүйлэн санана” нэвтрүүлгээ чухам яагаад хийх болсноо сонирхуулахгүй юу?
-Монголчуудын маань гадагшаа чиглэсэн урсгал өдрөөс өдөрт нэмэгдсээр   байгаа. Тэд хүний нутагт очоод хөлөө олж, жигдэртлээ  тодорхой хугацаа туулдаг. Энд ирсэн хүн дор хаяж  таван жил болж учраа олж, хэл усны болон ямар нэг  бэрхшээлгүй болдог л доо.   Энэ бол хувь хүний амьдралын   хувьд  урт хугацаа. Энд ирсэн ихэнх хүн  алсдаа буцна гэсэн бодолтой байдаг. Тийм болохоор хүний нутагт  будилж, хайран  цагаа барж явснаас  арай  дөт,  товчилсон  зам болж магад гээд  бусдынх нь туршлага, ололт, зөвлөгөөг хүргэхийг  хичээж энэ нэвтрүүлгийг хийх санаа төрсөн.

Нөгөө талаар харь нутгаас илгээж байгаа мөнгөний ард  тухайн хүний гуниг, ганцаардал, тэвчээр байдгийг үзүүлэхийг хүссэн.  Хүний амьдрал богино шүү дээ. Тэгэхээр биенээ ойлгож, хайрлаж бас юм болгоныг амжуулах хэрэгтэй биз дээ. (инээв)

-Нэвтрүүлгээ ямар вэб хуудсуудад тавьсан бэ?
-Одоогоор   www.medeelel.com дээр тавьсан байгаа.

-Монголд аль нэг телевизээр цацах бодол бий юү?
-Байж болно. Сайн санал хэлсэнтэй нь  ярина даа...(инээв)

-“Монголжин” студийн бүтээлүүд үе үе телевизээр гардаг. Та боломжийн нөхцлөөр киногоо өгдөг үү?
-Монголд байхдаа  тэгдэг л байсан. Харин энд ирснээс хойш тооцоо төлбөр хийгдээгүй. Хожим болох биз дээ.

-Та нарыг нэвтрүүлгээ хийж байх үед  хүмүүс харь нутагт  хийдэг  ажлаасаа  ичиж нэрэлхээд хэлэхгүй  байх  тохиолдол гарч байсан уу. Багш, эмч, инженер гээд сэхээтнүүд   гадаадад их ажиллаж байгаа шүү дээ?
-Үгүй дээ. Тухайн улс орны нийгмийн сэтгэлгээг  дагаад тэр үү манайхан юу хийдгээ  үнэнээр нь  хэлдэг. Нэрэлхээд байх нь гайгүй. Америкчууд шударга,  энгийн хүмүүс. Энд өссөн хүүхдүүд яг тийм болж төлөвшсөн нь ажиглагддаг. Ер нь хүний нутагт ажил төрөл олоод  хийж чадаж байгаа хүн юунаасаа ичих  билээ дээ. Америкт  ажил олж хийхийн тулд хэл устай, унаа тэрэгтэй, жолооны шалгалт өгөөд үнэмлэхтэй болсон байхаас эхлээд санхүүгийн найдвартай байдал түүх намтараа  шалгуулах гэх мэт олон даваа  бий. Тиймээс ажилтай байна гэдэг бахархал.Хуулиараа долоо хоногт дөчин цаг ажиллана гээд  заачихсан байдаг юм билээ. Манайхныг ажилсаг, ажлыг сэтгэлээсээ хийдэг, хэлний авъяастай болохоор ажилд  авах дуртай байдаг гэж олонтаа сонссон.

-Улс үндэстэн бүрийн онцлог гэх үү, тус тусын  эрхэлдэг ажилтай байдаг гэж үнэн үү. Мексикууд  гэхэд л зүлэг ногоо арчилдаг гэсэн?
-Тийм ээ. Манайхан цалин өндөртэй тухтай ажил эрхэлдэг. Анх хэлний мэдлэг хүрэхгүй үедээ аахар шаахар  ажил хийдэг л юм.

-Монголчуудын авдаг цалингийн дундаж хэд бол?
-Энд бие биенийхээ орлогыг болон хувийн асуудлыг сонирхоод байдаггүй болохоор  тодорхой хэлж мэдэхгүй байна. Манай хотынхон  багцаагаар 3000-5000 ам.доллар авдаг.

-Байр үнэтэй юу?
-Үнэтэй шүү. Хэдэн өрөө байр түрээслэхээс шалтгаалаад  сарын төлбөр 700, 800-гаас эхэлнэ дээ.

-Танайх албан ёсоор ажиллаж, амьдрах ногоон карттай юу?
-Тиймээ.

-Таныг үлдсэн кинонуудаа DVD болгоно гэдгийг сонссон...
-Тийм ээ, төлөвлөж байгаа. Яг одоо “Үгүйлэн санана” нэвтрүүлгээ багцлаад “Америкт амьдрахуй” нэртэй DVD болгон хэвлүүлж байна. Удахгүй худалдаанд гаргана. HiFi-гийн бүх салбараас авч болно.

-Та  ажлаа сараар төлөвлөдөг үү, жилээр төлөвлөдөг үү?
-Аль алинаар нь. Том төлөвлөгөөгөө үе үе нээж хардаг.  Тэгээд  “Батцэцэг ээ, чи үүнийг илүү анхаарна шүү” гэж өөртөө захидаг. Төлөвлөснөө уншаад биелснээр төсөөлөх их сайхан шүү дээ. Өөрийн эрхгүй маргааш руу тэмүүлэх сэтгэл төрдөг. Өдөр тутам төлөвлөснөө  амжуулж чадаж байвал  том төлөвлөгөөний нуруу нугаларч байгаа нь тэр.

-Магадгүй таны амжилтын үндэс ч төлөвлөлттэй холбоотой юм бил үү... Та залуугаасаа бичиж төлөвлөдөг байсан уу?
-Өө, урсгалаараа явсан үе бий. Хийх зүйлээ төлөвлөж бичээд, түүнийгээ байнга харж бай гэж аав, ээж минь сургасан юм даа.

-За одоо ярианы сэдвийг ялимгүй өөрчилье. Олон уншигч бүсгүйчүүд танаас асуугаасай гэсэн асуулт руу оръё.  Та гоо сайхны нууцаасаа хуваалцаач. Нүүрээ хэрхэн арчилж байна вэ?
-За, нууц гэх юм юу байхав дээ. Наранд их түлэх, хуурайших хоёрт арьс  хөгширдөг учраас нарнаас хамгаалдаг тос, зовхины болон  шөнийн  тос түрхээд л явж байна даа. Бид тэр талаар одооны охид шиг нарийн ойлголтгүй бүдүүн баараг явж шүү дээ. Гараа нарнаас хамгаалж байгаа нь энэ гээд халуун зун цагаан бээлий өмсөөд явдаг байлаа шүү дээ. Харин  хумсаа залуугийн л ургуулж арчлах дуртай  байсан. Одоо нэг их урт ургуулахаа больсон.

-Жингээ барихын тулд яах ёстой вэ?
-Орой унтахын өмнө л юм идэхгүй байх хэрэгтэй. Би орой болонгуут өлсчихдөг эсрэг инстинктэй хүн. Жин нэмчих гээд болдоггүй юм. Заримдаа жингээ үзэхгүй тааваараа явж, явж ямар нэг арга хэмжээнд орох болонгуут турахаар дасгал хийж баахан аахилдаг даа. Тэгж байж л хэмжээндээ очдог. Миний бие уг нь их “дуулгавартай”.

-Тэр хэмжээ нь хэд гэсэн үг вэ?
-58 кг. Гэхдээ сүүлийн үед 60, 62-той байгаа.

-Хүн эхлээд өөртөө хайртай байх ёстой юу,  бусдад хайртай байх ёстой юу?
-Өөрийгөө хайрлаж байж бусдыг хайрлах эрч хүчтэй болно  биз дээ