ОХУ-ын залуу тэшүүрчин Павел "Паша" Кулижников Канадын Калгари хотноо болсон Дэлхийн цомын 500 м-т дэлхийн дээд амжилтыг шинэчлэн тогтоолоо. Оросын тэшүүрчдийн түүхэнд 26 жилийн дараа энэхүү төрөлд дэлхийн рекордыг шинэчилж байгаа нь энэ аж.
Өнгөрсөн улиралд Павел дэлхийн шилдгүүдийн эгнээнд жагссан бөгөөд өмнөх рекордыг эвдэхээсээ өмнө дэлхийн хошой аварга болж амжсан байж. Тэрбээр төрөл бүрийн ДАШТ-д амжилттай оролцож, 18 жилийн дараа эх орондоо алтан медалийг авчирсан юм.
Калгарид болсон Дэлхийн цомын тэмцээнд тэшүүрчин эр 500 м-т эхний гүйлтэндээ 34,11 секундын амжилтаар ОХУ-ын дээд амжилтыг шинэчлэн тогтоожээ. 1000 м-т ч тэрбээр (1.07,33) улсынхаа дээд амжилтыг эвдэж, Голландын Гербен Йорритсмийн дараа барианд орсон юм. 500 м-т сүүлийн тойрог эхлэхийн өмнө Кулижниковыг дэлхийн дээд амжилтыг шинэчлэх боломжтой хэмээн шинжээчид үзэж байлаа. Энэ зайд олон төрөлтийн дэлхийн дөрвөн удаагийн аварга, Канадын Жереми Вотерспун дээд амжилтыг эзэмшдэг байв. 2007 онд 500 м-т дээд амжилт тогтоосон Вотерспун “Миний дээд амжилтыг Кулижников шинэчилбэл тэр нь үнэхээр цагаа олсон хэрэг юм. Кулижников эхний гүйлтийн үеэр рекордыг эвдэх боломжтой байсан ч гараан дээрээ багахан алдаа гаргачихлаа” хэмээн AD N1-т өгсөн ярилцлагадаа өгүүлжээ.
Эдүгээ 21 настай Кулижников харин хоёр дахь оролдлогоороо 34 секундэд уг зайг туулж, дэлхийн дээд амжилтын эзэн болсон байна. Энэ нь 1989 оноос хойш ОХУ-ын тэшүүрийн спортын түүхэнд дэлхийн дээд амжилтыг тогтоосон анхны явдал болсон юм.
Пашагийн хувьд допингийн хяналт маш чухал байжээ. “Би ямар ч хүч нэмэх бодис хэрэглээгүй. Цэвэр шударгаар тэмцээнд оролцдог. Хөнгөн атлетикийн зарим тамирчдаас л өөр хүн” хэмээн өгүүлсэн байдаг. Харамсалтай нь 2012 онд тэрээр допингийн шалгалтанд бүдэрсэн удаатай. Өсвөр үеийнхний ДАШТ-ий алт, мөнгөн медальт Паша олны итгэл найдварыг ихэд хүлээсэн нэгэн байсан боловч дээрхийн улмаас тэрээр тэмцээнд оролцох эрхээ хоёр жилээр хасуулсан юм. Гэхдээ түүний хувьд хэцүү өдрүүд нэгэнт ард хоцорч одоо дэлхийн рекордыг эзэн болжээ. Залуу тамирчин хэрвээ гэмтэл бэртлээс холуур байж чадвал дэлхийн дээд амжилтыг дахин шинэчлэх хугацаа хангалттай байгаа гэж үздэг.