Хэдийгээр 40 нас хүрсэн ч өнгөтэй барилдаж буй Кёкүтэнхо есөн барилдаанаас найман даваа авч башёг тэргүүлэгчдийн эгнээнд бичигдэж байна. Тэрбээр мэргэжлийн сүмод 1801 дэх барилдаанаа хийж, 903 дахь ялалтаа байгууллаа. Түүнээс өмнө ганцхан экс комүсүби Оошио 1800-гаас илүү барилдаан хийсэн юм. Мөн 902 удаа ялалт байгуулсан Кёкүтэнхогийн өмнө 951 даваатай Китаноүми, 964 даваатай Оошио, 1045 даваатай Чиёнофүжи, 1047 даваатай Кайо нар л байна.
Мөн тэмцээний тэргүүлэгчдийн хоёрдугаар эгнээнд явж буй 69 дэх ёкозүна Хакүхо мэргэжлийн сүмод 874 дэх ялалтаа байгуулж, түүхэнд долоод бичигдэж эхэллээ. Тэрээр домогт Тайхо аваргыг гүйцсэн юм. Мөн 32 дахь түрүүгээ авахын төлөө бүгдийг дайчилж буй “Цагаан гарьд” мэргэжлийн сүмод нэг онд хамгийн олон ялалт авсан рекордыг эзэмшдэг. 2014 онд Хакухо 75 ялалт байгуулаад байна. Мөн үлдсэн долоон өдөр хэрхэн барилдах нь олны анхаарал татаж байгаа юм.
