Англи төдийгүй дэлхийд алдартай “Манчестер Юнайтед” клубийн Монгол дахь дэмжигчид өчигдөр багийнхаа Премьер лигийн 20 дахь түрүүнд зориулсан баярын парад зохион байгууллаа. “Монголын улаан чөтгөрүүд” ТББ-аас санаачлан зохион байгуулсан тус арга хэмжээнд 150 гаруй хүн хамрагдсан байна. Энэхүү байгууллага Монголд 1300 гаруй гишүүнтэй бөгөөд өмнө нь нийгэмд чиглэсэн олон үйл ажиллагаа явуулж байв.

Тухайлбал, зургадугаар сарын 1-нд хүүхдэд зориулсан арга хэмжээ зохион байгуулсан бол өнгөрсөн жил Батсүмбэр дэх асрамжийн газарт тусламж үзүүлж байжээ. “Манчестер Юнайтед” бол Английн аварга шалгаруулах тэмцээнд 20 удаа түрүүлж, дээд амжилт тогтоосон алдартай баг. Тус багийг сүүлийн 26 жилийн турш удирдсан шотланд мэргэжилтэн А.Фергюсон энэ улирлыг дуусгаад тэтгэвэрт гарах болсноо мэдэгдсэн юм.

Английн хөлбөмбөгийн түүхэн дэх хамгийн алдартай дасгалжуулагчийн халааг “Эвертон”-ы 50 настай дасгалжуулагч Дэвид Мойес авахаар болсон билээ.