Монгол Улсын гавьяат тамирчин Готовдоржийн Өсөхбаяр Хойд мөсөн далайг амжилттай гатлан, Улсынхаа далбааг намируулсан анхны монгол хүн боллоо. Дөрөвдүгээр сарын 6-нд эх орноосоо мордсон тэрбээр уржигдар Монголын цагаар 20.30-д хамгийн хүйтэн цэгт хүрсэн баярт мэдээгээ ирүүлсэн юм. Хойд туйлд хүрэхийг олон жил мөрөөдсөн уулчин залуу зорилгоо биелүүлсний дараа сансрын “Иридиум” холбоогоор уг аяллыг санаачлагч, Монгол Улсын Ерөнхийлөгч Ц.Элбэгдоржтой хамгийн түрүүнд холбогдож, аялал нь санаснаар бүтсэнийг уламжилжээ.

Өсөхөөгийн багийн ахлагч Кейд Хегер мөн манай төрийн тэргүүнтэй ярьж, “Монгол хүний тэсвэр тэвчээр, хүч чадлыг уулчин Г.Өсөхбаяраар төлөөлүүлэн ойлгож, өөрийн эрхгүй бахархаж байна. Бидний гар нийлсэн аялал хамтын хүчээр бүтлээ. Багийн гишүүдийн бие сайн байгаа” хэмээн өгүүлсэн байна. Хойд туйлын оргил цэгт тус багийнхан хоёр хонохоор төлөвлөжээ. Улмаар тэндээсээ маршрутын дагуу Норвеги руу нисэх бөгөөд манай баатар энэ долоо хоногт амжиж эх орондоо ирэх сурагтай.