Гялгар уут, машины дугуй, ашигласан тос, хуванцар зэрэг хог хаягдал хөрсөнд шингэхгүй, байгаль орчныг удаан хугацаагаар бохирдуулдгийг бид мэднэ. Харин эдгээрийг дахин боловсруулж, байгаль орчноо хамгаалаад зогсохгүй, эдийн засагт ашигтай бүтээгдэхүүн үйлдвэрлэж болдгийг та мэдэх үү. Хөрсийг өнө удаан хугацаагаар бохирдуулдаг эдгээр хог хаягдлыг дахин боловсруулж, бидний импортоор авдаг бензин, евро-4 стандартын дизель түлш болгон хувиргадаг “Ахуй мандал” үйлдвэр өчигдөр үүдээ нээлээ.

Улаанбаатар хотоос 85 км зайд, Багахангай дүүргийн нутаг дэвсгэрт байрлах энэхүү үйлдвэрийн нээлтэд ҮХАА-н дэд сайд Б.Цогтгэрэл, нийслэлийн Засаг даргын Хөдөлмөр эрхлэлт, нийгмийн хамгааллын асуудал хариуцсан орлогч Ц.Буяндалай, Экологи, ногоон хөгжлийн асуудал хариуцсан орлогч Т.Бат-Эрдэнэ тэргүүтэй хүмүүс оролцлоо.“Ахуй мандал” үйлдвэр хоногт 10-12 тонн ашигласан тос, 10-15 тонн дугуй, хуванцар зэрэг хог хаягдлыг боловсруулж, 7-8 тонн дизель түлш үйлдвэрлэх хүчин чадалтай. Дэлхийн жишигт нийцсэн, хамгийн сүүлийн үеийн техник технологиор баригдсан бүрэн автомат үйлдвэр юм байна. Ийм төрлийн үйлдвэр дэлхийн ихэнх оронд байдаг ажээ.

“Ахуй мандал” үйлдвэрийг байгуулахад гурав орчим тэрбум төгрөгийн хөрөнгө оруулалт хийсэн бөгөөд энэхүү зардлаа богино хугацаанд нөхөх боломжтой гэнэ. Үйлдвэрлэлийн явцад гарч байгаа дайвар бүтээгдэхүүнээ дахин ашигладаг учраас хаягдал гардаггүй гэсэн. Иймээс байгаль орчинд ямар ч сөрөг нөлөөгүй аж. Одоогоор үйлдвэрийн удирдлагууд бүтээгдэхүүнээ хэдэн төгрөгөөр борлуулахаа шийдээгүй байгаа ч зах зээлийн ханшаас хямд байна хэмээв. “Үйлдвэрийнхээ эхний хэсгийг өнөөдөр ашиглалтад орууллаа. Удахгүй гялгар уут болон бусад түүхий эд боловсруулж, нефть гаргах үйлдвэр барина” хэмээн “Ахуй мандал” үйлдвэрийн дэд захирал Б.Энхмандал ярив.

ҮХАА-н дэд сайд Б.Цогтгэрэл “Манай улс хөгжихийн хэрээр валютаа гадагш гаргаад байна. Ялангуяа, нефтийн бүтээгдэхүүн худалдан авахад ихэнх мөнгөө зарцуулдаг. Тиймээс нефть үйлдвэрлэх бүх оролдлогыг төр засаг дэмжиж байгаа. Түүхий эдийн хангалтыг баталгаажуулах, татварын хөнгөлөлт үзүүлэх зэргээр дэмжинэ. Эл үйлдвэрийн үйл ажиллагаа өргөжиж, байгальд ээлтэй ийм үйлдвэр манайд дахин баригдана гэдэгт итгэж байна” хэмээлээ. “Ахуй мандал” үйлдвэр 50 орчим ажилтантай ч дахин боловсруулах үйлдвэр бүрэн автомат учир үйлдвэр дотор ердөө л хоёр хүн ажиллах гэнэ. Түүхий эдээ нийслэл болон бусад аймгаас кг-ийг нь 30-350 төгрөгөөр үнэлэн татаж байгаа аж. Одоогоор сар гаруй хугацаанд бүтээгдэхүүн үйлдвэрлэх түүхий эдээ нөөцлөөд байгаа гэсэн.

Д.Дайрийжав