Францын алдарт саксафонч Мартин Якобсен Монголын “Giant jazz” хамтлагтай хамтран өнгөрөгч мягмар гаригт Хөгжим бүжгийн коллежийн концертын танхимд багахан хэмжээний тоглолтоо толилууллаа.

“Summer time”, “Gjan blues”, “Precher” бүтээлийг жааз хөгжмийн хэлээр толилуулсан уран бүтээлчид үзэгчдээс халуун алга ташилт сонссон юм.

ССАЖ-ын сайд Ц.Оюунгэрэл “Өнөөдөр эрх чөлөө, үзэл бодлын илэрхийлэл болсон жааз хөгжмийг жинхэнэ утгаар мэдэрлээ. Боолуудын эрх чөлөөг хүсэмжлэх сэтгэлээс үүсэлтэй жааз хөгжим дэлхийн хүмүүст багагүй өөрчлөлт авчирсан. Жаазыг эх орондоо хөгжүүлэхийн төлөө уран бүтээл туурвиж, хөдөлмөрлөж буй эдгээр залуусаа ССАЖЯ дэмжих болно” хэмээсэн. Саксафоны сэтгэл сэргээм аялгууг мэргэжлийн түвшинд толилуулж үзэгчдийг баясгасан Мартин Якобсентэй товчхон ярилцлаа.

-Монголд ирсэн сэтгэгдлээсээ хуваалцана уу?

-Өглөө босоод цонх нээхэд маш сайхан цэнхэр тэнгэр харагддаг. Би олон газраар аялсан ч сэтгэл сэргээсэн ийм сайхан цэнхэр тэнгэр харж байгаагүй. Мөн монгол хүүхдүүдэд мэргэжлийн жааз хөгжмийг хэрхэн тоглохыг зааж, Монголын уран бүтээлчидтэй хамтран тоглож байгаадаа баяртай байна.

-Монгол хүүхдүүд хичээлийг тань хэрхэн хүлээж авч байна вэ?

- Би өнгөрсөн оны арванхоёрдугаар сард Монголд ирж, анхныхаа сургалтыг зохион байгуулсан. Өнөөдрийн тоглолтод тэдэнтэйгээ хамтарч хоёр бүтээл толилууллаа. Монгол хүүхдүүд авьяаслаг. Заасан зүйлсийг маш хурдан ойлгож, хүлээж авдаг. Ер нь монголчуудын хоёр хүний нэг нь урлагийн авьяастай байх.

-Монголын жааз хөгжмийн хөгжлийг хэрхэн дүгнэж байна вэ?

-Бусад орон шиг зуу зуун жааз хөгжимчин байхгүй ч энэ хөгжим танай улсад асар хурдацтай хөгжих боломж байна. Үндэснийхээ хөгжмөөр жаазын шинэ урсгал гаргаж буй нь их таалагдсан гэв. Тэрбээр ирэх тавдугаар сард хамтлагийнхантайгаа Монголд дахин ирэхээр төлөвлөж буй аж.