АНУ-ын Лос Анжелес хотноо энэ сарын 6-10-нд болж өнгөрсөн “Filmapalooza” хэмээх олон улсын богино хэмжээний кино наадамд манайхаас “Absolute pictures” студийн бүтээл “Эзэгнэгч” кино оролцож буй. Дэлхийн 120-иод орны уран бүтээлчид оюун ухаан, авьяас чадвараа сорьсон тус наадамд Францын кино түрүүлсэн байна. Харин манай “Эзэгнэгч” кино энэхүү наадамд өрсөлдсөн Азийн орнуудын бүтээлээс хамгийн өндөр амжилт үзүүлж, шилдэг жүжиглэлт гэсэн номинацид нэр дэвшжээ.

Энэ тухай тодруулахаар “Absolute pictures” студийн найруулагч П.Дэлгэрбаяртай чатлав. Тэрбээр “Манай “Эзэгнэгч” кино “Filmapalooza” наадамд өрсөлдсөн триллер жанрын олон кинон дундаас ганцаараа шилдэг жүжиглэлт номинацид нэр дэвшлээ. Мөн Япон, Хятад, Солонгос, Филлипин тэргүүтэй Азийн бусад орны кинонуудаас Монголынх илүү амжилт үзүүлсэн нь энэ. Монгол Улсын нэрийг өндөрт өргөсөн хамт олондоо баярлалаа. Наадмын шилдгийн шилдгээр шалгарсан Францын кино үнэхээр мундаг бүтээл байна билээ” хэмээв .

Л.ГАНЧИМЭГ