Улс төрийн шинжлэх ухааны судлаачдын XXII их хурал энэ сарын 7– 13-нд Испанийн нийслэл Мадрид хотноо болж өндөрлөлөө. Дэлхийн 100 гаруй орны 2000 орчим төлөөлөгч оролцсон энэ хуралд Монголын Улс төр судлаачдын нэгдсэн холбооны ерөнхийлөгч, МУИС-ийн профессор Ц.Ганболд урилгаар оролцсон байна.

“Засаглалын хэлбэрүүд ба түүний хил хязгаарын шилжилт” сэдвийн дор зохиогдсон энэ удаагийн хуралдаанаар “Харьцуулсан улс төр”, “Улс төрийн институт”, “Жендер ба бүс нутаг”, “Олон улсын улс төрийн эдийн засаг”, “Нийтийн захиргаа”, “Улс төрийн үйл байдал” зэрэг сэдвээр эрдэмтэн судлаачид санал бодлоо солилцжээ.

Тэрбээр олон улсын Улс төрийн шинжлэх ухааны холбооны ерөнхийлөгч, профессор Леонорда Морлино (Итали), дэд ерөнхийлөгч Дирк Верг Шлоссер (Герман) нартай уулзаж, Монголын улс төр судлаачдын нэгдсэн холбоог олон улсын холбоонд гишүүнээр элсүүлэх талаар хэлэлцээ хийжээ. Түүнчлэн тус холбооны 60 жилийн ойд зориулсан тусгай хуралдаанд оролцон, “Монгол дахь ардчиллын чанар” сэдвээр илтгэл тавьсан аж.