Нийтийн
тээврийн хэрэгслээс ялгардаг хорт утааг 30 хүртэлх хувиар бууруулахаар
“Агаарын бохирдлыг бууруулах үндэсний хороо”-ноос нэгэн ажил эхлүүлжээ.
БНСУ-ын “Daewoo” компаниас оруулж ирсэн 400 автобусны хөдөлгүүрийг
дизелиэс гадна хийн түлшээр ажиллах хөдөлгүүрээр сольж байна. Эхний
ээлжинд “Автобус-1” компаниас 120, “Автобус-3”-аас 80, “Цахилгаан
тээвэр”-ээс 50 автобусанд ийм хөдөлгүүр тавьж байгаа аж. Дээрх компаниудад туршилтыг зэрэг явуулж байгаа бөгөөд хос түлшээр ажиллах автобусуудыг эхнээс нь үйлчилгээнд гаргахад бэлэн болжээ. 105 литрийн баллонд шахсан хийн түлшээр 700-800 км зам туулна. Одоохондоо автобусуудыг хийн түлшээр цэнэглэхдээ явуулын станц ашиглах ч цаашид томоохон баазуудад зориулалтын станц суурилуулах юм байна. Дараагаар нь хувийн хэвшлийн долоон аж ахуйн нэгжийн 150 автобусыг дээрх төсөлд хамруулах аж.
Дизель
түлш дутуу шатаж, агаарт ихээхэн хорт утаа ялгаруулдаг бол түүн дээр
хийн түлш нэмж өгснөөр бүрэн шатдаг юм байна. Ингэснээр эдийн засаг
талаасаа ч дан дизель түлш хэрэглэсэнтэй харьцуулахад 15 хувийн хэмнэлт
гарч, хөдөлгүүрийн эдэлгээ ч харьцангуй уртасна гэдгийг оношлогоогоор
тогтоожээ.
Л.Аргамжин
