Улс
оронд нь болсон гамшгийн улмаас Японы автомашин үйлдвэрлэгчид
үйлдвэрлэлээ зогсоогоод байна. Тус улсын зам харгуй эвдэрч сүйдэн, нэг
хэсэгтээ тэндээс монголчууд машин авчрах боломжгүй боллоо. Үүнийг
Монголын автомашины ченжүүд далимдуулан, борлуулж буй машиныхаа үнийг
500.000-2.000.000 төгрөгөөр нэмжээ. “Зуд болоход нохой зоолно” гэж энэ
биз. “Өнгөрсөн долоо хоногт нэг машин авахаар төлөвлөж, үнэ ханшийг нь
судалчихсан байсан юм. Өнөөдөр ирээд авах гэтэл үнээ хоёр сая төгрөгөөр
нэмчихэж, болихоос” хэмээн нэгэн залуу ярив.
Өчигдөр “Да хүрээ” захад очиход 2006 онд үйлдвэрлэсэн “RAV-4” 32 сая, автомат хөдөлгүүртэй “Ланд круйзер-80” 25 сая, “Tоёота витз”-ийг үйлдвэрлэсэн он болон Монголд оруулж ирээд унасан эсэхээс шалтгаалж 5-7.4 сая төгрөгөөр борлуулж байлаа. Гэхдээ ченжүүд бүгд үнээ нэмээгүй аж. Японд үйлдвэрлэсэн машины үнийг яагаад нэмснийг ченжүүдээс асуухад “Японоос нэг хэсэгтээ машин ирэхгүй шүү дээ. Тэгээд ч цунамид цохиулж, газар хөдлөхөд эвдэрч муудсан машин л хоёр, гурван сарын дараа ирнэ. Гайгүй япон тэрэгтэй болох гэж байгаа бол одоо авсан нь дээр дээ” гэж зарим нь зөвлөв.
“Гамшиг болохоос өмнө Японд машины үнэ яльгүй нэмэгдсэн. Тиймээс бид зарж буй машиныхаа хуучин үнийг жаахан өсгөсөн” гэж тайлбарлах хүн ч таарлаа. Машины үнийг дагаад сэлбэгийн ханш ч өсчээ. Харин солонгос машинуудыг цагаан сарын өмнөх ханшаар нь зарж байв. Хамгийн гүйлгээтэй бараа болох “Верна аксент”-ын үнэ дунджаар долоон сая төгрөг байсан юм.
Арлын Японд болж буй гамшгийн дүйвээнээр эх газрын Монголд юмныхаа үнийг нэмдэг ченжүүд арай ч дээ. Өөдгүй ченжүүд энд зохиомол “цунами” үүсгэж байхад өрөвдмөөр байдалд байгаа япончууд тэнд байгаагаа бусадтайгаа хуваан хэрэглэж, үйлчилгээний газрынхан байшин нь дайвалзан, хамаг эд хогшил нь савлаж байхад ч хүмүүст үйлчилж явна. “Нэр хугарахаар яс хугар” гэж үг бий сэн.
