УИХ-ын дарга Д.Дэмбэрэл хоёр өдөр дараалан Чингэлтэй болон Баянзүрх дүүрэгт ажилласан. Энэ талаар түүнээс зарим зүйлийг тодруулав.

-Дүүргүүдээр явахад иргэдээс хэлсэн хамгийн их гомдол юу байв?

-Би Чингэлтэй, Баянзүрх гэсэн нийслэлийн томоохон дүүргээр явахдаа тодорхой зорилт тавьсан. Өерөөр хэлбэл, засаг захиргааны нэгжийн ажиллагааны хувьд хороод ажиллаж байна. Гэхдээ Орон нутгийн засаг захиргааны нутаг, дэвсгэрийн нэгжийн тухай хуульд өөрчлөлт оруулах зайлшгүй шаардлага байгааг мэдлээ. Өнөөдөр 9-10 мянган хүн амтай хороод байна. Дүүрэг гэхэд 100-200 мянган хүнтэй, гэтэл Засаг захиргааны нэгжийн хуулиар олгосон эрхийн хүрээнд хороо, дүүргийн Засаг дарга нарын эрх үүрэг нь хуучин хуульчилсан тэр түвшинд ажиллаад амжилт гаргах боломжгүй юм гэж дүгнэхээр байна. Жишээлбэл, хорооны Засаг даргад ямар ч эрх мэдэл байхгүй, зөвхөн гүйцэтгэгчийн эрх мэдэлтэй гэж байгаа. Жишээлбэл, ямар нэгэн хуулийн талаар иргэдээс асуухад тодорхой салбар чиглэл хэлж байна. Ялангуяа шүүх, поркурор, цагдаагийн байгууллагатай холбогдон гарсан хууль хэрэгжихдээ шударга бус байдлаар ханддаг, шийдвэр буруу гарснаас гомдож байгаа хүн их байна.

-Иргэдийн ахуй амьдрал ямар байна вэ?

-Янз янз, эрээнтэй бараантай байна. Гэхдээ бараантай байдал нь нэмэгдэх хандлагатай болжээ. Жишээлбэл, айлуудаар ороод сонсож байхад өнөөдрөө л болгож байна, ер нь хэцүү байна гэсэн өрх маш олон байна. Яахав та бүхэнд гомдоод яриад байх юм алга, засаг төрд юу гэхэв. Гэхдээ л ер нь өдрөө нэг юм болгож байна гэх жишээтэй. Харин зонхилох хэсгийг эзэлж магадгүй байгаа айлууд нь “Ерөөсөө ийм байдлаар амьдрахад хүнд байна. Надад ажил ч алга, амьдрал ч алга, хүүхэд сургууль, соёл гээд маш их бэрхшээл байна. Өдөр хоногийг арайхийн өнгөрөөж байна” гэсэн айлууд харьцангуй их байна.

Нийслэлийн хувьд газрын асуудал төвөгтэй байдалд байна. Зарим айл буух боломжгүй тийм газарт гэрээ барьсан, элдэв ус суваг дээр баригдсан байх жишээтэй. “Өлзийт хороололд намайг оч гэж байгаа. Гэтэл сургуулийн өдий төдий хүүхэдтэй, дээд сургуулийн оюутнуудтай тийшээ яаж нүүж очих юм бэ” гэдэг асуудал тавьж байгаа. Энэ нь нийслэлийн газар төлөвлөлт, олголтын асуудал ямар төлөвлөгөөгүй явж ирсэнтэй холбоотой. Тийм учраас айлууд хаана буух нь эмх цэгцгүй болсон. Мөн хүүхдийн мөнгөний талаар нэлээд ярьж байсан. УИХ-аар өнгөрсөн өвөл Хүний хөгжлийн сангийн тухай хуулийг баталж, иргэн бүртээ хишиг хүртээхээр болж, Монгол Улсын хөгжлийн сангаас олгож байсан хүүхдийн мөнгийг зогсоосон. Гэвч санхүү эдийн засгийн хямралтай энэ үед хүүхдийн мөнгө олгохыг зогсоосон нь түргэдсэн алхам болжээ. Хүүхдийн мөнгөөр амьдралаа залгуулдаг олон өрх байдаг талаар иргэд ярьж байна. Тэдний хувьд cap тутам 3000, улирал бур 25 мянган төгрөг авах нь амьдралд нь нэмэр болдог тухай иргэд хэлж байсан. Иймээс ойрын үед хүүхдийн мөнгийг эргэн харж, Засгийн газартай дээрх асуудлуудыг ярилцан шийдвэрлэх арга хэмжээ авах бодолтой байна.