Йогийн дараах дасгалууд нь зөвхөн нурууны ачааллыг бууруулаад зогсохгүй, гэдэсний булчинг чангаруулж, хоол боловсруулах болон зүрх судасны системын эрхтнүүдийн үйл ажиллагаанд таатай нөлөө үзүүлнэ.  Дасгалыг тогтмол хийснээр бэлхүүс, гэдэс орчимд хуримтлагддаг өөх багасдаг. Бүх дасгалыг гурван удаа давтан хийх хэрэгтэй.

1. Бэлтгэл байдал сандлаа өнцөглөж сууна. Нуруу цэх, мөр эгц, эрүү бага зэрэг доош байх хэрэгтэй. Хөлөндөө мөрний хэмжээтэй зай авч хөлийн улыг шаланд бүрэн хүргэнэ. Гараа биеийн дагуу байрлуулна.

2. Амьсгал авахдаа зүүн гараараа сандлынхаа аравчаас барьж, мөрөө бүх л чадлаараа арагш болгоно. Энэ байдлаа хэдэн минут барь.

3. Амьсгалаа сүүлийн байрлалд байхдаа гаргах хэрэгтэй.

4. Дараагийн амьсгал авахдаа баруун талаараа хий.

5. Дараа нь дасгал улам хүндэрнэ. Үүнд: Сандлаа хоёр гараараа бариад зүүн тийш эргэнэ. Энэ байдлаа хэдэн минут барина.

6. Дасгалыг нөгөө тал руу давтан хий.

Бүх л дасгалын үед амьсгал авах гаргах нь нэгэн хэвийн жигд байх хэрэгтэй. Бүх булчингуудад ачаалал очсон, энэ нь танд сайн мэдрэгдэх ёстой. Нуруу, хүзүү, гэдэсний хэсэг, гар болон ар нуруу орчмын булчингуудад ачаалал жигд зөв очиж байгаа эсэхэд хяналт тавиарай. Дасгалыг хийх үед булчингуудаа чангална. Хэрвээ ажил дээрээ хийж байгаа бол бас суллах хэрэгтэй.

Дараагийн дасгал бол хүзүүний булчингийн ачааллыг бууруулж, мэдрэлийн ачааллыг багасгаж, ядаргаа тайлах үйлчлэл үзүүлнэ. Энэ дасгалыг заавал гурван удаа давтан хийх хэрэгтэй.

1. Бэлтгэл байдал сандлын ирмэгт сууна. Нуруу цэх, мөр шулуун, эрүү бага  зэрэг доош байх хэрэгтэй. Хөл мөрний хэмжээний зайтай, хөлийн ул шаланд бүрэн хүрсэн, гараа биеийн дагуу байрлуулсан байна.

2. Толгойгоо бага зэрэг гэдийлгэн, гараа тохиогоороо нугалж, толгойны ард барина.

3. Амьсгал авахдаа арагш чангалж, тохойгоо хоёр тийш болгон, нуруу, хүзүүгээ чангална.

4. Энэ байдлаа долоон секундээс багагүй хугацаагаар барь. Цаашид энэ хугацааг тогтмол нэмэх хэрэгтэй.

Мөрөө эргүүлэх нь нурууны булчинг чангаруулж, уян хатан болгож, гарын булчинг чангалснаар ажлын өдрийн ид дунд булчингийн ачааллыг багасгаж өгдөг. Энэ дасгалыг гурван удаа давтах хэрэгтэй.

1. Эхлээд сандлыг ирмэглэж сууна. Нуруу цэх, мөр шулуун, эрүү бага зэрэг доош байрлалтай байна. Хөл мөрний хэмжээтэй зайтай, хөлийн улыг шаланд бүрэн хүргэнэ. Гараа биеийн дагуу байрлуулна.

2. Амьсгал авахдаа зүүн мөрөө дээш өргөж гаргахдаа буулгана. Амьсгалаа маш гүн, намуухан авч, гаргах хэрэгтэй.

3. Дараа нь баруун мөрөөрөө мөн адил давтан хийнэ. 

4. Үүний дараа хоёр мөрөөрөө ээлжлэн эхлээд урагш, дараа нь арагш эргэх хөдөлгөөнийг хийнэ.

Толгойны  иллэг

Толгойн иллэг нь толгойны өвчинг намдаан, мэдрэлийн ачааллыг бууруулж, анхаарлаа төвлөрүүлэхэд тустай. Энэ дасгалыг гурван удаа давтан хийгээрэй.

1. Дасгалыг хийхийн өмнө сандлаа ирмэглэж суу. Нуруу цэх, мөр шулуун, эрүү үл ялиг доош байрлалтай байна. Хөл мөрний хэмжээний зайтай, хөлийн ул шаланд бүрэн тавиатай, гар биеийн дагуу байрлалтай байна.

2. Зүүн гараа тохиогоор нь нугалж, алгаараа зүүн санчигт дарна. Хоёр минут хэртэй зүүн шанааны орчим алгаараа иллэг хийнэ. Иллэгийг намуун, хөнгөн хийхээс гадна, амьсгалаа чөлөөтэй, гүн авах ёстой.

3. Дараа нь энэ дасгалыг баруун гараараа давтан хийнэ.

4. Хоёр гараараа иллэгийг зэрэг хийнэ.

5. Дасгалыг хийж дуусмагцаа хоёр гараараа духны орчим тойрог хөдөлгөөнөөр зөөлөн иллэг хийгээрэй.

Энэ бүх хөдөлгөөн нь намуун зөөлөн байх ёстой.

Эдгээр йогийн дасгалыг хоол цадтал идсэн үедээ хийж болохгүй. Өглөө, өдөр, орой хэзээд ч хийж болно. Уг комплекс дасгал нь суугаа ажилтай үед илүү ачаалалтай байдаг нуруу, хүзүү орчмын булчингуудыг суллаж өгнө.

Дасгалыг хайнга хийвэл үр дүн гарахгүй. Зааврын дагуу зөв хийж чадвал ачаалал ихтэй хэсгүүдийн булчингуудын цусны эргэлт сайжраад зогсохгүй  хөдөлгөөнгүй байгаа хэсгүүдэд ч эргэлт хурдасна. Нэг янзын байрлалаар удаан суухад үүсдэг таагүй байдал, бие чилэх явдал арилна.

Дээрх йогийн дасгалуудыг өдөр тутам хийж заншвал сэтгэл санаа өөдрөг болж, суугаа байдлаас үүсэлтэй таагүй байдал, тавгүйрэл арилна…