Өмнөд Солонгост эмнэлгээс гарсан өвчтөнийг дахин титэм вирус (MERS)-ийн халдвар авсан хэмээн оношилж, Сөүл хотын төв эмнэлэгт тусгаарлажээ. Өвчтөн эмнэлгээс гарахаасаа өмнө нийтийн тасагт бусад өвчтөнүүдтэй харилцаж байснаас вирус олон хүнд халдварласан байх магадлалтай гэнэ. Өмнөд Солонгост өнгөрсөн тав, зургадугаар сард нийт 186 хүн титэм вирусээр халдварлаж, 36 хүн нас барсан юм. Харин түүнээс хойш дахин халдвар гараагүй. Ойрхи Дорнодоос гаралтай титэм вирусээр халдварласны эхэн үед ямар нэг онцгой шинж тэмдэг илэрдэггүй аж. Дархлаа нь муудсан хүмүүс уг өвчинд хамгийн өртөмтгий ба уг вирусийн эсрэг вакцин одоогоор байхгүй. Ойрхи Дорнодын бүс нутагт тус вирусийн халдвар авсан өвчтөнүүдийн 40 хувь нь нас бардаг бол Өмнөд Солонгост энэ үзүүлэлт 18.8 хувьтай гарчээ.

Д.Болд