Экс-тэргүүн хатагтайд 20 жилийн хорих ял оноолоо
Кот-д ‘Ивуарын шүүх тус улсын тэргүүн хатагтай асан Симона Гбагбод 20 жил хорих ял оноожээ. Түүнийг 2010-2011 онд гурван мянган хүний амь насыг авч одсон улстөрийн хямралын үеэр “үндэсний аюулгүй байдлыг сүйтгэх” оролдлого хийсэн хэмээн буруутгасан байна.
Энэ талаар France Presse агентлаг шүүхийн дарга Тахир Дембелийн эх сурвалжтайгаар мэдээлжээ. Шүүгчид 65 настай Гбагбогийн гэм буруутайг санал нэгтэй хүлээн зөвшөөрсөн аж. 2014 оны сүүлээс явагдаж эхэлсэн шүүхийн үйл ажиллагааны үед прокурорын зүгээс тэргүүн хатагтай асанд 10 жилийн ял оноохыг хүсч байсан гэнэ.
2010 оны 11-р сард тус орныг 10 жил удирдаж байсан Лоран Гбагбо ерөнхийлөгчийн сонгуульд Ассалан Уаттард илт ялагдсан атлаа албан тушаалаас буухаас татгалзсаны уршгаар улс оронд нь улстөрийн хямрал оволзож, хоёр талынхны зэвсэгт мөргөлдөөн хэдэн сар үргэлжлэхэд хүрсэн юм.
Гбагбогийн талынхны эсэргүүцэл 2011 оны тавдугаар сард няцаагдсан ба үүний дараахан НҮБ болон Францын зэвсэгт хүчнийхэн энэхүү зөрчилд оролцож эхэлсэн билээ. Лоран Гбагбог хүний ёсны эсрэг гэмт хэрэгт буруутган баривчилж, Олон улсын эрүүгийн шүүх /ОУЭШ/-д шилжүүлжээ. Түүний хэргийг шүүх ажиллагаа 2015 оны 7-р сард эхлэх аж.
Д.Билэгт