Монголын Боксын холбооны Удирдах зөвлөл энэ сарын 2-нд хуралдаж хэд хэдэн асуудал хэлэлцжээ. Уг хурлын шийдвэрээр эрэгтэйчүүдийн шигшээ багаас ОУХМ Х.Энхдэлгэрийн сонирхогчдын боксд тоглох эрхийг нь бүх насаар нь хассан байна. Мөн эмэгтэйчүүдийн шигшээ багааас ОУХМ М.Нандинцэцэг, Э.Уянга, О.Сувд-Эрдэнэ нар хөөгдсөн байна. Манай улсын шигшээ багт энэ гурван тамирчин л байдаг аж. Яагаад энэ гурван тамирчинаа хөөх болов гэхээр тэд шигшээ багийн дасгалжуулагч Б.Энхтайваны хэлсэн ярьсан бүхнийг үл хүндэтгэж байсан гэнэ.

Тэд Жэжүд болсон ДАШТ-д багийн дасгалжуулагч Б.Энхтайваныг үл хүндэтгэж, түүний ур чадварыг голон, хэл ам таталж байсан байна. Тэд хуучин шигшээ багийн дасгалжуулагч байсан Л.Энхбаатарын удирдлага дор хичээллэхийг хүсчээ. Монголын шилдэг гурван тулаанч бүсгүйчүүд дасгалжуулагчаа голсон шалтгаан нь Б.Энхтайван тамирчидтайгаа бүдүүлэг харилцдаг, зан харьцааны асуудалтай хэмээн гомдолсон байна. Иймээс тэднийг шигшээ багаас хассан бөгөөд тэмцээнд оролцохыг хүсвэл өөрсдөө зардалаа гаргах болжээ. Эх сурвалжийн мэдээлж буйгаар тамирчин бүсгүйчүүд Холбооноосоо уучлал хүсч, алдаагаа ойлгож засахыг хүсвэл МБХ асуудлыг эргэн харж болох гэнэ.