14,5 дюймын сүүлтэй энэтхэг эрийг нутгийнхан нь бурханчлан шүтэж байна.

Алипурдуар районы оршин суугчид 35 настай Чандраг Энэтхэгийн сармагчин дүрт бурхан Хануманы хувилгаан дүр хэмээн итгэдэг ажээ.

Түүний модон дээр ямар ч төвөггүйгээр авирч чаддаг чадвар нь үүний баталгаа хэмээн хүмүүс боддог гэнэ.

Тиймээс хүмүүс түүний Баруун Бенгалия дахь гэрийнх нь ойролцоо цугларч, сүүлнээс нь адис авч, хүрэхийг чухалчлах болжээ.

“Бид Чандраг Хануманы хойд дүр хэмээн итгэдэг бөгөөд сураг сонсвол тэр Гэгээн Хануманы өдөр төрсөн гэлцдэг. Тийм учраас бид түүнд итгэж байгаа юм” хэмээн хүмүүс ярьж байна.

Гэхдээ энэ бол алс бөглүү газрын хэт сүсэг бишрэлтэй хүмүүсийн бодол.

Харин шинжлэх ухаан үүний талаар арай өөр дүгнэлт хийжээ.

Эмч нар Чандраг ховор тохиолдох төрөлхийн гажигтай хэмээн тодорхойлсон аж.
Ингээд тэд түүнийг “сүүлнээс” нь ангижруулж өгөхийг санал болгоход дүрдээ итгэсэн Чандра шууд татгалзсан гэнэ.

“Бага байхад ээж миний сүүлийг тайрч хаяхыг хүссэн. Гэвч би өндөр халуурч, эгээ л нөгөө ертөнцөд морилчихоогүй. Тэрнээс хойш ээж юу ч болж байсан сүүлээ битгий тайраарай гэж хэлсэн. Гэр бүлийнхэн маань сүүлийг бурханлаг гэдгийг мэдэрсэн” хэмээн Чандра ярьжээ.

Сүүлтэй Чандратай гэрлэх бүсгүй олдохгүй өдийг хүрсэн ч саяхан нэг эмэгтэй түүнд дурласан гэнэ.

Тэр Чандрагаас гурван насаар эгч ч гэлээ тоосон нь их юм гээд тэр боддог гэнэ.

Одоо Чандра өөрийн гэсэн сүмтэй болж, хүмүүсийг сүүлнийхээ хүчээр олноор нь адислаж байхыг хүсч байгаа ч санхүүгийн бэрхшээлээс болоод мөрөөдлөө биелүүлж чадахгүй суугаа гэнэ.