Монгол Улсын Морин хуурын чуулгынхан өнгөрсөн оны аравдугаар сард 20 жилийн ойн баяраа ёслол төгөлдөр тэмдэглэн өнгөрүүлсэн. Түүний дараа Улсын филармонийн 40 жилийн ойн тоглолт эхэлж, тус чуулгынхан өрнүүн ажилтай байсан ч 2012 оныг үдэх хамгийн сүүлчийн хонхтой зэрэгцэн бахархам амжилтын мэдээгээ бидэнд дуулгасан юм.

Японы алдарт жүжигчин, NHK-ийн хөтлөгч Такашитатай хамтран Морин хуурын чуулгынхан өнгөрсөн оны арванхоёрдугаар сард Токио, Осака, Госсен хотоор аялан тоглолт хийжээ. “Сүхийн цагаан морь” зохиолыг уншиж сонирхуулахын зэрэгцээ морин хуур хөгжмийг япончуудад танилцуулдаг энэ төслийг Төрийн шагналт хөгжмийн зохиолч Б.Шарав санаачлан хэрэгж үүлсэн юм билээ.

Аялан тоглолт амжилттай болсон төдийгүй Японы “Асахи шимбүн” сонинд энэ тухай нийтлэгдэн олны хүртээл болсон байна. Түүнчлэн тус чуулгын дэргэдэх морин хуурын дөрвөл “Саруул тал” нэртэй төслийг гурав дахь жилдээ хэрэгжүүлэн арлын улсад 17 удаагийн тоглолт хийгээд иржээ. Тэд тоглолтынхоо орлогоор Хөвсгөл аймгийн Цагааннуур сумын эмнэлэгт тоног төхөөрөмж авч бэлэглэхээр төлөвлөсөн гэнэ. Өмнө нь “Саруул тал” төслийг хэрэгжүүлэгчид ЭХЭМҮТ-ийн Нярайн эрчимт эмчилгээний тасаг болон Нэгдүгээр амаржих газарт эх барихад зориулсан тоног төх өөрөмж бэлэглэж байсан юм.

Морин хуурын чуулгын дэргэдэх “Арга билэг” этно жааз хамтлагийнхан өнгөрсөн сарын 19-21-нд АНУ-д болсон Олон улсын жааз хөгжмийн наадамд оролцоод ирсэн бол тус чуулгын дунд хуурч, ХБК-ийн багш Д.Адъяабазарын шавь нар болох Б.Цэлмэг, Б.Шинэсарнай нар АНУ-д болсон “Сrescendo international competition”-д оролцож хоёрдугаар байр эзэлжээ. Морин хийл тоглодог охид энэ сарын 20-нд алдарт “Карнеги холл”- ын тайзнаа тоглохоор уригдаад байгаа. Төрийн хошой шагналт хөгжмийн зохиолч Н.Жанцанноров, ардын жүжигчин Ш.Чимэдцэеэ, удирдаач Д.Түвшинсайхан, морин хуурч Ж.Уугантуяа, Х.Батзаяа нар Энэтхэгийн Дармасалад очиж Дээрхийн гэгээн Далай ламын хурлын үеэр очиж тоглолтоо сонирхуулжээ.