ЭБЭХЯ, Үндэсний хөгжил, шинэтгэлийн хороо, Уул уурхайн мэдээллийн нэгдсэн сан “Mining.mn” хамтран Монголын нүүрсний салбарт хөрөнгө оруулагчдын   “Coal Mongolia 2012” олон улсын чуулга уулзалтыг хоёр дахь жилдээ зохион байгуулах гэж байна. Энэ удаагийн чуулга уулзалтыг Монгол Улсад уул уурхайн салбар үүсэж хөгжсөний 90 жилийн ойн хүрээнд “Нүүрс-Монголын эрчимтэй хөгжлийн хурдасгуур” уриан дор ирэх сарын 9, 10-нд зохиох аж.

    Монголд хэрэгжүүлж буй нүүрсний хайгуул, олборлолт, боловсруулалтын төслүүдэд хөрөнгө оруулалт татах, байгаль орчинд ээлтэй, шинэ дэвшилт техник технологи нэвтрүүлэх, олон улсын харилцан үр ашигтай хамтын ажиллагааг хөгжүүлэх зорилготой уг чуулганд АНУ, ОХУ, БНХАУ, Канад, Австрали улсын Элчин сайд нар оролцоно. Энэ удаагийн чуулга уулзалтыг дэлхийн хэвлэл мэдээллийн хэрэгслүүдийн нэгэн томоохон суваг болох “Bloomberg” телевизээр анх удаа цацах гэж байгаа нь гадаадын нэр хүндтэй, хүчирхэг хөрөнгө оруулагчдын сонирхлыг манай руу хандуулах болно гэдгийг зохион байгуулагчид хэлэв.
Энэхүү арга хэмжээнд гадаад, дотоодын 700 гаруй төлөөлөгч оролцох бөгөөд уул уурхайн чиглэлээр үйл ажиллагаа явуулдаг томоохон 62 компанийн тухай үзэсгэлэн гаргах аж. Мөн энэ үеэр нүүрсний салбарын шилдгүүдийг шалгаруулах юм байна.