Олон улсын зэрэглэлийн “Future Mongolia 2012” үзэсгэлэн худалдаа Монголд болно. Манай улсын Засгийн газар, Германы Машин, тоног төхөөрөмж үйлдвэрлэгчдийн холбооны дэмжлэгээр ирэх тавдугаар сарын 16-19-нд болох уг арга хэмжээний ерөнхий зохион байгуулагчаар энэ чиглэлээр туршлагажсан Германы “VF Messe GmbH” компани ажиллаж байна. Уул уурхайн машин техник хэрэгсэл, барилгын болон барилгын материал үйлдвэрлэх тоног төхөөрөмж, хөдөө аж ахуй, хот тохижилт, байгаль орчин, эрчим хүч, замын хөдөлгөөний техник хэрэгсэл үйлдвэрлэдэг, борлуулдаг олон улсын томоохон аж ахуйн нэгж, байгууллага энэ үеэр үйл ажиллагаагаа сурталчилна.

Үзэсгэлэнг зохион байгуулагч тус компанийн захирал, ноён Штефан Фишер тэргүүтэй төлөөлөгчид өчигдөр улстөрч, дипломатч, бизнес эрхлэгчдэд мэдээлэл өгч, үзэсгэлэн худалдаанд оролцох хүсэлтэй компаниудыг мэдүүлэг, сурталчилгаагаа өгөхийг уриалав. Олон улсын үзэсгэлэн худалдаанд оролцох сонирхлоо Ази, Европ, Америкийн нэр хүндтэй компаниуд илэрхийлж, бүртгүүлээд эхэлжээ. “Монголын компаниуд ч үйл ажиллагаагаа олон улсад сурталчлах боломжийг алдахгүй гэж найдаж байна. Үзэсгэлэн худалдааны үр дүнд Монголын компаниуд гадаадынхантай холбоо тогтоож, үйл ажиллагаагаа өргөтгөх боломжтой.