Монгол Улс дэлхийн 150 оронтой дипломат харилцаатай. Харин УИХ-д 51 орны парламентын бүлэг ажилладаг юм байна. Хамгийн олон гишүүнтэй нь 46 хүнтэй Монгол-Хятадын бүлэг бөгөөд даргаар нь УИХ-ын дэд дарга Г.Батхүү ажилладаг. Энэ бүлэг гурван дэд даргатай аж.

Су.Батболдын ахалдаг Монгол-Япон (37), Э.Мөнх-Очирын тэргүүлдэг Монгол-БНСУ (32), Ц.Батбаяр даргатай МонголФранц (31), Н.Энхболдын удирддаг Монгол-Оросын (26) бүлэг гишүүнийхээ тоогоор Монгол-Хятадын бүлгийн дараа ордог.

Олон улсын парламентын холбооны дүрмийг хүлээн зөвшөөрсний үндсэн дээр Монголын парламентын бүлгэмийг байгуулсан бөгөөд тус бүлгэмийн хүрээнд хоёр талын бүлгүүд ажиллаг аж. Дашрамд дурдахад, УИХ-ын гишүүдээс Н.Энхболд анх удаа ОУПХ-нд хамгийн өндөр албан тушаалд ажилласан нь юм байна.

Тэрбээр ОУПХ-ны Гүйцэтгэх хорооны 15 гишүүний нэгээр сонгогдон ажиллаж байв. ОУПХ 1889 онд байгуулагдсан. Эгнээндээ 145 орны парламентыг багтаасан дэлхийн улс төрийн томоохон байгууллага юм.