Монголын уран нугараач охид АНУ-ын үзэгчдийг тоглолтоороо гайхшруулж, “Wendy Williams”-ын шоунд оролцон, “New York Times” сонины тэргүүн нүүрэнд зургаа татуулсан баяртай мэдээг дуулгая. “X roses” студийн уран нугараач охид есдүгээр сараас эхлэн АНУын “Apple” цирктэй хамтран ажиллаж, аялан тоглолтод нь оролцож байгаа юм билээ.

Олон улсын уралдаан, тэмцээнд өндөр амжилт гаргасан жүжигчдийг урилгаар ажиллуулдаг энэ циркийн “Dance on” хөтөлбөрт Б.Уянга, Ц.Алтанцэцэг, Б.Алтжин, Б.Ихэрцэцэг, Б.Золбоо нар ажиллаж байгаа юм. Тэдний багш соёлын тэргүүний ажилтан Т.Будтай цахим өртөөгөөр холбогдож энэ талаар тодрууллаа.

-Сайн байна уу, уран бүтээл амжилттай юу?

-Бидний тоглолт амжилттай үргэлжилж байна. Ирэх сарын 9-нийг хүртэл Нью-Йорк хотод тоглох юм. АНУ-ын үзэгчид манай нугараачдын тоглолтыг маш өндөр үнэлэн хүлээн авч байна. “New York Times” сонинд ч гэсэн энэ талаар мэдээлж, охидын зургийг эхний нүүрэндээ гаргасан.

-Бас телевизийн шоунд оролцсон гэв үү?

-Тийм ээ. Алдартай жүжигчид, дуучдыг урьж ярилцлага авдаг “Wendy Williams”-ын шоунд оролцож, олон хүнд уран бүтээлээ хүргэх завшаан тохиолоо. Мөн NBC телевизид ярилцлага өгсөн.

-АНУ-д хэр удаан ажиллах вэ?

-2011 он хүртэл ажиллах гэрээ хийсэн.

-“Apple” цирк АНУ-д хэр алдартай вэ. Та нар ямар, ямар улсын циркчидтэй хамтран ажиллаж байна вэ?

-“Apple” цирк 1974 онд байгуулагдсан. Жил бүр шоугаа өөрчилдөг ба “Dance on” бол 33 дахь хөтөлбөр нь. Энд хятад, орос, болгар, кени, америк, герман, франц жүжигчид ажилладаг.

-Өдөрт хэдэн удаа тоглодог вэ?

-Өдөрт ихэвчлэн нэг удаа, хааяа хоёр тоглолттой байдаг.

www.mongolnews.mn - Эх нутгийн чимээ