МУИС-ийн ОУХС-ийн Дипломат орчуулгын тэнхимийн багш, хэл шинжлэлийн ухааны доктор, профессор Цэрэнчимидийн Саранцацралд Монгол улсад орос хэл, соёлыг  хөгжүүлж,дэлгэрүүлэхэд байгуулсан гавъяаг нь үнэлж,  11–р сарын 12-ны өдөр М.В.Ломоносовын нэрэмжит Москвагийн Улсын их сургуулийн Хүндэт профессор цол өргөмжиллөө. 

Ц.Саранцацралд Хүндэт профессорын үнэмлэхийг  Москвагийн их сургуулийн ректор Виктор Садовничий гардуулан, ёслолын арга хэмжээнд тус сургуулийн эрдмийн зөвлөлийн эрхэм гишүүд байлцаж баяр хүргэв.  Москвагийн их сургуулийн Хүндэт профессор болсон анхны монгол  эрдэмтэн Ц.Саранцацрал нь тус сургуулийг хэл шинжлэлийн мэргэжлээр дүүргэж, улмаар дэд эрдэмтэн болон докторын зэргийг амжилттай хамгаалсан байна. 

Энэхүү цолыг Москвагийн эрдмийн зөвлөлийн шийдвэрээр онцгой гавъяа байгуулсан шинжлэх ухаан, соёл урлаг, төр-олон нийтийн  гарамгай зүтгэлтэнүүдэд, тус сургуулийг төгссөн  буюу бусад их, дээд сургуулийн болон эрдэм-шинжилгээний байгууллагуудын шилдэг төлөөлөгчдөд олгодог аж.

www.mongolnews.mn - Эх нутгийн чимээ