БНСУ-ын Ерөнхийлөгч Ли Мен Бакийн дэргэдэх зөвлөх байгууллагын төлөөлөгч манай улсаас хуурамч диплом өвөртөлжээ

БНСУ-ын Үндэсний Эв нэгдлийн Монгол дахь гишүүн Ким Сү Нам боловсролын хуурамч диплом ашиглаж байсан нь тогтоогдож, Солонгос даяар шуугиан болж байв. Хуурамч диплом ашиглаж, удирдах албанд томилогдчихоод, хэрэг нь илрэхээр нүүр хийх газаргүй болтлоо муулуулдаг явдал манай улсад удаа дараа гарч байсан билээ. Энэ хэрэг явдал дурын нэг солонгос хүнд манай боловсролын байгууллагынхан мөнгөний диплом гаргаж өгдөг гэдгийг нотлов.

Тодруулбал, БНСУ-ын Ерөнхийлөгчийн биет төлөөлөгч солонгос залуу МУИС-ийн хуурамч дипломоор гайхуулж яваад баригдаж, Солонгосын цагдаагийн байгууллагад шалгагдаж эхэлжээ. БНСУ-ын Үндэсний Эв нэгдэл нь Ерөнхийлөгч Ли Мен Бакийн дэргэдэх зөвлөх байгууллага бөгөөд дэлхийн улс орнуудад эх орноо төлөөлж, нийгэм, улс төрийн бодлого хэрэгжүүлэх, нутаг нэгтнүүдийнхээ эрх ашгийг хамгаалах үүрэгтэй. Гэтэл Монголд нутгаа төлөөлдөг гишүүний өөрийн орны Чэжү их сургуулийн Хөдөө аж ахуйн дээд сургуулийг дүүргэсэн гэх диплом, Монголын МУИС-ийн Хууль зүйн их сургуулийг эрхзүйч мэргэжлээр төгссөн гэх боловсролын гэрчилгээ хуурамч байсан нь тогтоогдсон нь тэр. Энэ нь Ерөнхийлөгчийн дэргэдэх Үндэсний Эв нэгдлийн Монгол дахь төлөөлөгч болохын тулд хийсэн түүний башир арга хэмээн албаныхан мэдэгдсэн байна.

Ким Сү Нам нь “Их Засаг” их сургуулийн Хууль зүйн факультетийн магистрт элсэн суралцахын тулд өөрийн орны Чэжү их сургуульд газар тариалангийн чиглэлээр бакалаврын зэрэг дүүргэсэн гэж хуурамч бичиг бүрдүүлсэн байж. Элсэн орсныхоо дараа хичээлдээ нэг ч удаа суулгүй хандивын аргаар дипломаа худалдаж авсан байна. Үүнийг нь тус сургуулийн удирдлагууд хүлээн зөвшөөрсөн байна. Түүний заль үүгээр зогсохгүй МУИС-ийн Хууль зүйн сургуулийг 2002-2004 он Эрхзүйч мэргэжлээр төгссөн гэсэн хуурамч диплом авч дөнгөжээ. Түүнтэй холбогдох хэрэг сөхөгдөх үед МУИС-ийн Хууль зүйн сургуулийн захирал Л.Нарангэрэл Монгол дахь Солонгосын Элчин сайдын яаманд “Энэ хүн манайд суралцаж байгаагүй” гэсэн тодорхойлолтыг албан ёсоор хүргүүлсэн байна.

Хуурамч Ким Сү Намын дээрх хэргүүд илрэх хүртэл тэрээр “Хан миам” нэртэй хууль зүйн товчоог хууль бусаар ажиллуулж, эрхзүйч биш атлаа солонгосууддаа хууль зүйн болон санхүүгийн чиглэлээр тусламж үзүүлнэ хэмээн мөнгө “тоншдог” байсан нь шалгалтын явцад батлагдав. Түүний ажлын өрөө “Сүнжин гранд” зочид буудалд байрладаг. Энэ бүх үйл явдал илэрсний дараа ч тэрээр хуурамч дипломтой хууль зүйн товчоогоо ажиллуулсаар байж. Эцсийн дүндээ дээрх хуурамч бичиг баримтыг бүрдүүлж Монгол дахь БНСУ-ын Элчин сайдын яаманд өгснөөр сая нэг юм Ерөнхийлөгч Ли Мен Бакийн дэргэдэх Үндэсний нэгдлийн гишүүн болж чаджээ.

Солонгос хүнтэй гэр бүл болсны дараах...
Солонгосуудын үйлдсэн базаахгүй хэрэг үүгээр зогсохгүй хилээр хар тамхи оруулж ирэх, монголчуудыг залилах, хүчирхийлэх, секс аялал жуулчлалыг сурталчлах, бусдын амь насыг онц хэрцгийгээр хөнөөх, зодож танхайрах гэмт хэргүүд өдрөөс өдөрт нэмэгдэж байгааг цагдаагийн байгууллагаас мэдээлж байна. Өдгөө тэднээс айх хамгийн том шалтгаан нь хүн худалдаалах гэмт хэрэг. Олон монгол бүсгүйг өөрийн эрхэнд байлгадаг нь нууц биш. Тус улсын эрчүүдтэй зуучлалаар танилцсан монгол бүсгүйчүүд амь насаа алдахаас эхлээд бэлгийн болон эд эрхтэн, хөдөлмөрийн хүчирхийлэл, мөлжлөгөд байгааг хүний эрхийн байгууллага анхааруулсаар байна.

Иргэний бүртгэл, мэдээллийн төвийнхний хийсэн судалгаагаар гадаадын иргэдтэй гэр бүл болсон монгол бүсгүйчүүдийн 70 орчим хувь буюу 3485 эмэгтэй хангүг эртэй дэр нэгтгэжээ. Тэдний 10 хүрэхгүй хувь нь л хайр сэтгэлээрээ гэрлэсэн бол олонх нь зуучлалаар дамжин мөнгөний төлөө сонголт хийжээ. Монгол охид зуучлалын компанийн үзүүлсэн “царайлаг, залуувтар” солонгос залуусын зураг, баян гэсэн үгэнд хууртан мөрөөдлийн ханхүүгээ олчихсон мэт сэтгэл дүүрэн хилийн дээс давна. Бодит байдалд тахир дутуу, гаж донтой, өвдөг эрүү нийлсэн хөгшин, эсвэл хоолны мөнгөгүй, үгээгүй ядуу гээд нутагтаа гологдсон эрчүүд угтдаг байна. Хүний эрхийн байгууллагынхан гэр бүл зуучлалын компаниуд бүсгүйчүүдэд хуурамч зураг үзүүлж, худал хэлж байгааг анхааруулсаар байтал тэд үл тоомсорлодог гэнэ. Ийм байдлаас болж хохирсон зарим бүсгүйн ярьсныг дурдъя.

-…Нөхрийн маань гэр Сөүлээс таван цаг явж хүрдэг тосгон байлаа. Тосгон нь жижигхэн учраас миний тухай сайн, муу яриа тарчихсан байсан юм. Нөхөр намайг цоожтой өрөөнд хорьчихоод өдөр, шөнөгүй ёс бусаар хүчирхийлнэ. Тэгээд зогсохгүй зарцалдаг байсан. Би тэр тарчлааныг их удаан тэвчсэн. Монгол руугаа буцъя гэхээр туслах хүн олдохгүй, ядаж байхад нутагтаа өр тавиад ирсэн учир надад тарчлаант байдлаар амьдрахаас өөр зам олдоогүй. Нэг өдөр тосгондоо монгол залуутай таарснаар зугтах боломж олдсон юм.

-…Өрөнд баригдчихсан үедээ солонгос залуутай гэрлэхээр шийдэж сонины нийтэлсэн зарын дагуу “Хан пид” зуучлах товчоонд хандлаа. Тэд хоёр ч хонолгүй “Чи их азтай хүн байна. Сайн хүн олдсон” гээд Солонгосын иргэн У Шин Гын гэдэг залуутай танилцуулсан. Бид 2006 оны дөрөвдүгээр сард гэр бүлээ батлуулснаар миний хар дарсан зүүд шиг амьдрал эхэлсэн. Тэр этгээд, гаж зуршилтай. Тэжээдэг 30 гаруй нохойгоо нэг нэгээр гэдсийг нь хүү татан алж, таашаал авдаг байсан. Нэг өдөр хархны зулзага түүж ирээд миний толгой дээр асгасан гээч. Өдөр бүр “Гар загтнаад байна” гээд намайг зоддог. Заримдаа найзууддаа намайг “Энэ хүнийг хүссэнээрээ ашигла” гээд өгчихдөг байсан. Энэ зовлонг их удаан тэвчиж байж, саяхан нэг юм оргож чадсан.

-…Зуучлалын нэгэн компаниар дамжуулж танилцаад би солонгос залуутай гэр бүл болсон. Бид анхандаа аз жаргалтай байсан. Тэр надад өөрийгөө баян гэж танилцуулсан ч бодит байдалд зүгээр л загасчин байсан. Бид гэрлээд охинтой болсон. Гэтэл сүүлийн үед нөхөр маань охиноо хананд савж тарчлаах боллоо. Намайг эргэхээр ирсэн гэр бүлийнхнийг минь хүртэл зодсон. Тэглээ гээд одоо яахав, энэ хүний хүүхдийг гаргачихсан учраас тэвчихээс өөр зам алга” гэсэн нулимстай захидлууд байна.

Хар тамхины сүлжээний цаана ч солонгосууд байдаг
Мансууруулах бодисыг хил, гаалиар оруулж ирсэн хэрэгт сүүлийн үед солонгосууд буруутгагдаж байна. Цагдаагийн байгууллага солонгосуудын хар тамхины сүлжээг илрүүлжээ. Өнгөрсөн сард “Чингис хаан” олон улсын нисэх буудалд 320 ширхэг савлагаа бүхий сэтгэцэд нөлөөлөх бодис орхиж явсан хэрэг гарсан. Хар тамхийг оруулж ирсэн сэжигтнээр дөрвөн солонгос иргэнийг цагдан хорьж, мөрдөн шалгаж эхэлсэн байна. Сэжигтнүүдийг шалгах явцад солонгосын хэд хэдэн бүлэглэл Монголд үйл ажиллагаа явуулж байгааг тогтоожээ. 2007 онд Бээжин-Улаанбаатар чиглэлийн онгоцноос буусан монгол залуус хар тамхи хэрэглэж байгаад үйлдэл дээрээ баригдсан байдаг. Тэд мөрдөн байцаалтад “Солонгосын хөрөнгө оруулалттай хэд, хэдэн компанийн эздээс хар тамхи худалдан авсан” гэж мэдүүлжээ. Цагдаагийнхны шалгалтаар солонгосууд өөр төрлийн үйл ажиллагаа эрхэлж байгаа нэрийдлээр хар тамхины сүлжээ ажиллуулж байсан нь тогтоогдож, дуулиан тарьж байв.

Тэдний залилан, мөрийтэй тоглоом, хууль бус наймаа хэрээс хэтэрлээ
Шинэ цагийн шилийн сайн эр солонгосууд хоёр гурван компаниараа хослон улс дамнан луйвар хийж байна. Орон сууц барьж өгөх нэрийдлээр иргэдээс 1,4 тэрбум төгрөг завшсан “Хааны зам вако”, цахилгаан бараа нийлүүлэх нэрийдлээр арилжааны банкуудаас их хэмжээний зээл авсан “Номаранг”, “Солонгост ажиллуулна” хэмээн иргэдийг залилсан Сон Ян Жу зэрэг шинэ цагийн луйварчид. “Номаранг”-ийн гэх хэрэг нь тоног төхөөрөмж, бараа бүтээгдэхүүн нийлүүлэх нэрээр хууль бус зээл авч дундаас нь мөнгө хүүлэх зорилгоор хөгжингүй орнуудад “зээл” олгоход зуучилдаг, түр зуурын компани байжээ. “Байжээ” гэхийн учир нь энэ бизнесээ Монголд хийсний дараахан тус компанийн нийлүүлдэг “зээлийн” мөн чанар Солонгосын хуулийнхны өмнө илэрч компани нь дампууран хууль бус наймаа хийснийхээ төлөө компанийн захирал Ли гэгч эмэгтэй шоронд хоригдож буй юм.

Мөн Япон, Солонгосын иргэд нууцаар интернет ашиглан хууль бус мөрийтэй тоглоом ажиллуулж байсан долоон газрыг цагдаагийн байгууллага илрүүлсэн. Уг казиног Сүхбаатар дүүргийн гуравдугаар хорооны нутагт байрладаг “Кастли гэйминг” компанийн захирал Э.Батсайхан солонгосуудтай хамтран ажиллуулж байсан аж. Тэд цөөн хүнд үйлчилж нууц кодтой тусгай өрөөнүүдэд үйл ажиллагаагаа явуулж байв. Энэ нь ганцхан удаагийн тохиолдол биш. Өдөр бүр илрэх хууль бус мөрийтэй тоглоомын далд эзэд нь солонгосууд байдаг болжээ.

Монгол охидыг ашиглан порно кино хийгээд баригдав
Солонгосуудын үйлдэж байгаа гэмт хэргийн нэг нь охидыг нүцгэлэн порно кино хийж, хүчирхийлэх зэргээр секс аялал жуулчлалыг сурталчлах. Тэд үйлдэл дээрээ хэд хэдэн удаа баригдаж, хуулийн хариуцлага хүлээсэн байдаг. Тухайлбал, 2006 онд МУБИС-ийн хичээлийн танхимд хоёр эмэгтэй оюутныг нүцгэлэн дүрс бичлэг хийж байхад нь цагдаа нар баривчилсан. Энэ хэрэг илчлэгдсэн цагаас хойш хэд хэдэн солонгос иргэн охидыг садар самуун хэрэгт уруу татсан хэргээр баривчлагдаж байв. Нийслэлийн хэмжээнд 50 гаруй кароаке болон шөнийн цэнгээний клубыг солонгосууд эрхлэн ажиллуулж байна.

Монгол охидыг хэрцгийгээр хөнөөв
БНСУ-ын Гуанжуд ажилладаг нэгэн монгол охиныг ойд дүүжлэн хөнөөсөн хэрэг өнгөрсөн 2006 онд гарсан. Солонгосын цагдаа нар охиныг гадны нөлөөтэй нас барсныг тогтоосон ч алуурчныг олж чадаагүй. Хожим нь түүнийг амиа егүүтгэсэн хэмээн хэргийг хаасан байна. Мөн 2007 онд монгол эмэгтэй гэр бүл зуучлагч компаниар дамжуулан хангүг эртэй дэр нэгтгэжээ. Эмэгтэй Сөүл хотод очоод хагас жил ч бололгүй амиа алдсан байна. Уг хэргийг тус улсын цагдаа нар “Амиа егүүтгэсэн” гэж үзээд хаасан ч шүүх эмнэлгийн дүгнэлтийг хохирогчийн ээжид өгөхөөс татгалзсан юм.

Тэгвэл Монголын иргэн Д.Ганцэцэгийг эхнэрийг нь өмөөрснийх нь төлөө Солонгосын иргэн Янсүён амь насыг онц хэрцгийгээр хөнөөсөн хэрэг оны өмнө гарсан. Түүнд Солонгосын шүүх 17 жилийн хорих ял ногдуулсан юм. Ийнхүү солонгосуудыг тойрсон балаг хэрээс хэтэрч байгааг өрнөж буй үйл явдлууд гэрчилсээр байна. Монголын төр харьд яваа иргэнээ өмгөөлж чадахгүй юм гэхэд хил дотроо байгаа хүнээ хамгаалах зориг алга гэж үү. Өнөөх амьд явах, аюулгүй орчинд амьдрах эрхийг баталгаажуулсан Үндсэн хууль хаана байна.