Жирийн иргэдэд загварын чиг хандлагыг тодорхойлж өгдөг хүмүүс бол урлаг соёлынхон.Тэдний юу өмсөх, тэр ч бүү хэл хийж байгаа үйлдэл бүрийг нь даган дуурайх хүн олон. Тиймээс шинэ жилээр урлаг соёлын зарим одод ямар дааншинзаар гангарахаар төлөвлөж байгаа талаар сонирхлоо. Гэхдээ тэдэнд
-Таны хамгийн үнэтэй дааншинз хаанахых вэ? Хэдэн онд хаанаас ямар үнээр авч байсан бэ?
-2010-2011 оны зааг дээр ямар даашинзаар гангарахаар төлөвлөж байна?
-Таны сэтгэлд үргэлж дурсагдаж байдаг шинэ жил?
гэсэн гурван асуултад хариу авснаа  дуулгая. Ингээд тэдний гоёлыг хамтдаа сонирхъё.

Хамгийн үнэтэй даашинз маань 600 мянга

Поп дива дуучин Соёлын тэргүүний ажилтан Ж.Алтанцэцэг

-Хамгийн үнэтэй гээд онцлох зүйл алга байна. Ер нь би даашинзаа 500-600 мянган төгрөгөөр авдаг даа. Өнгөрсөн жил дуучин Оюунбилэгийн дэлгүүрээс даашинз авч байсан.
-“Талст” дэлгүүрээс 500 мянган төгрөгөөр хоёр даашинз авсан. Мөн “Гялбаа” салоны Халиунаа гээд охин надад их гоё даашинз оёж байгаа.
-2000 оны шинэ жилийг гэж хэлмээр байна.Тэр үед би оны шилдэг дуучин болж байсан. Бас тоглолтоо хийж байлаа

“Emporio Armani”-гийн даашинз хамгийн үнэтэй нь

“Гурван охин” хамтлагийн ахлагч Ану

-Хамгийн үнэтэй нь “Emporio Armani”-гийн даашинз. 528 мянгаар авч байсан. Бас “Karen millenii”-ний даашинзыг 328 доллараар Америкаас захиалж авч байсан.
-Бэлэн байгаа гэхэд болно доо. Надад маш олон даашинз байдаг. Тэр өдөр аль нь таалагдаж байна, түүнийгээ л сонгоод өмсөнө дөө. Ер нь даашинз бэлэн байхад амар байдаг юм.
-Хүүхэд насны шинэ жилүүд хамгийн дурсамжтай байдаг. Өөрөө бага байсан болоод ч тэр үү зассан гацуур их том харагддаг байсан. Шөнө нь гэрлээ унтрааж байгаад гацуураа хараад суудаг хүүхэд байж билээ. Хүүхэд байхдаа өвлийн өвгөн байдаг гэдэгт итгэдэг байсан шүү. /инээв/

Би өмссөн хувцасныхаа үнийг хэлээд байх дургүй

УДЭТ-ын жүжигчин Т.Отгонцэцэг

-Би ер нь жил бүр “Урлах эрдэм” дээд сургуулийн урласан даа­шин­зыг өмсдөг. Тэдний даашинзууд тэр жилийнхээ загвар өнгө гээд бүх зүй­лийг нь тодорхойлдог уч­раас сонгодог. Харин үнийг нь хэлмээргүй байна. Ямар ч юмны үнийг хэлээд байх дургүй.  Би ийм зүйлд нэг их дуртай биш ээ.
-Мөн л Урлах эрдмээр хувцсаа тодорхойлуулна. Ер нь байнгын үнэнч үйлчлүүлэгч нь гэж хэлж болно.
-Шинэ жил бүр надад бяцхан дурсамжийг үлдээдэг. Тийм болохоор онцолж хэлээд байх зүйл алга байна.

Заавал даашинз өмсөх албагүй шүү дээ

Альтернатив дуучин Отгоо

-Одоо яг сайн са­нахгүй байна. Надад олон даашинз бий. Ихэвчлэн гадаадаас авахыг боддог. Япон, Америк гээд. Загвар нь давтагддаггүйгээрээ миний даашинзууд онцлогтой.
-Сонгоод байх зүйлгүй ээ. Олон даашинз байгаа болохоор зохицуулаад л өмсөнө дөө. Ер нь заавал даашинз гэлтгүй  очих газраасаа шалтгаалан энгийн сайхан хувцаслачихаж болно шүү дээ. Шинэ жил гэхээр л даашинз өмсөх албагүй.
-Өнгөрсөн жил юм уу даа. Би чинь жирэмсэн, хүүхдээ хэзээ төрөх бол гээд л хүлээж байсан үе болохоор хамгийн дурсамжтай аз жаргалтай шинэ жил маань байлаа.
Энэ жилийн гоёлоо Америкаас авсан

УДЭТ-ын жүжигчин Г.Хулан

-Он гарахын өмнөхөн Америкт байж байгаад буцах замдаа яараад нэг даашинз авч байсан. 800 доллараар авч байсан санагдаж байна.
- Миний даашинз бэлэн байгаа. Мөн Америкаас ирсэн.  Үнийг нь сайн мэдэхгүй байна.
-Бага байхдаа тэмдэглэдэг байсан шинэ жилүүд хамгийн аз жаргалтай мөч минь юм даа. Манай аав ээжийн найзууд манайд ирээд бас хүүхдүүд нь ирээд л их гоё байжээ. Энэ насандаа эргээд очихыг маш их хүсч явдаг. Аав ээж хоёр намайг төрөхөд гацуур бэлэглэж байсан гэдэг. Тиймээс шинэ жилээр авч байсан хамгийн том бэлэг гэвэл энэ.